夏日回顧......

咪以為我又失蹤係去左旅行喎, 鬼咩成個夏天都無去旅行, 連以前年年夏天都會去的船P我都無去呀!!
反而就食左好幾次雞煲(!) 認真撞鬼, 年頭第一次食雞煲仲話第一次食咋好開心呀咁...點知呢三個月都食左兩三次, 連邊爐都打左兩次......

七月, 主要係忙工作, 因為Manager出trip又返o黎, 出trip又返o黎...每次都好大陣仗咁忙足幾日。 再加上我最憎o既哥倫比亞同事來港一個月, 哼! 平時同呢個無理取鬧o既女人已經係e-mail開片; 仲要係公司對佢一個月真想打佢兩巴。好彩有個幾星期佢上左大陸, 仲有都好少搵我, 主要佢會煩住我manager。

私人生活? 都有o既, 就係食朋友慶生飯、家庭聚會、 同埋竟然有一次小學同學聚會。 嘩~~大大話話都有10年以上無聯絡啦, 因為畢業以後都無搵過大家。估唔到有成十幾廿人, 大家外貌都無咩點變 (除左我, 佢地話我個樣變左好多, 唔認得 -- 因為細個係薯嘜...hahaha~), 個whatsapp group仲不停講野, facebook真係偉大, 咁都搵得返。
仲有就係又報左法文班嘛, 停左半年又故操故業 (自作孽?)。

八月, 除左冇左哥倫比亞婆次外, 都係同七月的事務差不多! 仲唱左一次K, 去左朋友婚禮!!

不過無遊船河, 都有去游水, 今年夏天健康左好多呀!

姨媽生日飯

朋友生日飯局

B女又大個左, 仲貪靚左...成晚掛住玩我條手鍊

打邊爐..... 相信冬天會不停地打

食雞煲, 呢餐正!

唔講唔知原來烏溪沙青年新村係有間禮堂可以俾人行禮

仲幾靚tim噃! 我對上一次去呢樹, 係小學畢業營。

兄弟姊妹準備中....我係去觀禮咋!

靚靚新娘出埸~~

又有得食~真開心!

呢幾個月最唔同o既係, 我同另一位同事差唔多每日都一齊放工, 堅持唔OT (好啦, 有OT但要七點前走....) 互相鞭策! 另一樣係, 我幾乎無著過長褲, 因為太熱啦!! 每日都係短褲短裙, 就算對腳唔抏都係話之啦, 命仔要緊。大佬, 冬天凍都話可以著多件衫, 夏天熱起上o黎唔通脫左層皮咩? 真係最憎夏天! 連法文老師問大家如果見到神仙會許咩願, 我都話想無左夏天。

btw, 我終於得閒換左個核突背景,依家用我最鐘意o既「發姣粉」<-- 朋友係咁形容! 望到都好開心。呵呵呵~~