Saturday 27 October 2012

究竟邊到有得賣呢款郵票簿???

係開始打呢個星期的無聊事之前,
我好想問有無人知道究竟邊到有得賣呢款郵票簿???


我就唔明點解到到書局同文具店都話冇得賣好耐!
有d就淨係得大陸出個d好似相簿咁款白底有一張張膠片個隻,
仲要個封面老套到喊...........我唔鐘意!! >.<

"乞兒島"都見到有, 但係得細細本個隻,
封面又係樣衰到核爆......

我只不過想要返呢d傳統舊式郵票簿之嘛,
點解都咁難???

依家因為冇位放d郵票,
冇得分類放, 有位就塞,
搞到擠逼戶咁!!

究竟邊到有得賣呢款郵票簿???
----------------------------------------------------------------------------
今個星期除左去拜山, 探病之外,
仲有就係放工見下朋友仔,
工作最近好忙,
忙到連放工後連網都唔想上,
因為成日對住個電腦.......



秋天到啦, 又係BBQ的好時機......
今次又係去打擾友人夫妻,
仲勁食海鮮, 好正,
有海鮮的BBQ才是王道呢!!


仲去左大角咀打邊爐,
D食物好大份, 肥牛第一次係叫一碟就夠囉,
成座山咁高!
食到有人要打包,
好彩我地男仔同女仔都刷得,
唔算食淨好多~~
望下隔離檯, 人地連白蘿蔔都要打包,
真抵食!!

再來, 琴晚去了食素 + 糖水,



順便買左過新Phone case,
但依家有個好大的問題,
個電話套太實, 我又好怕夾硬來會整花個電話,
我拆唔返出o黎,
係咪咁就一世啦!!????

早幾日先發現原來阿b仔都有份玩喎今次~~ 呵呵!

Saturday 20 October 2012

探訪Hemingway故居

好多朋友聽到我去左美國玩都只係羨慕我有得休息咁耐,
但講到文化方面, 好多人都不屑 -- 美國冇咩歷史同文化,
Well~~~我以前都有咁o既諗法, 因為北美的歷史太短, 只有二至三百年。
始終, 大家都會覺得去歐洲玩, 係比美國型棍好多。

其實, 美國佬都唔係一無可取o既,
相信好多人都知道二十世紀著名小說家Ernest Hemingway係美國人,
其實佢係芝加哥出生ga喎。

今次去美國芝加哥住左幾個月,
都去左睇睇~~

臨走之前一日, 鬼仔就帶左我去佢故屋啦,
佢出生於Oak Park, 係Chicago的西部,
個一帶有好多Prairie Style o既屋企,
除左去Hemingway故居,
我地都去左著名建築師 -- Frank Lloyd Wright舊居,
但由於我當日只係用手機影相,
而部手機係我一返到香港就唔見左, 所以冇相。

**依家Hemingway 故居的相片都係由鬼仔send返俾我的,
(佢有用自己手機影)
我返到香港成個幾月後先收到d相, 佢效率真高。**

細個有嘗試睇過《老人與海》,
但對當時唔識野o既我o黎講係好悶o既,
所以對於Hemingway都冇咩特別感覺,
只係知道佢拎過好多文學獎同做過記者等等......
最後係Idaho州自殺~~~
(當然佢o既感情生活又係好豐富啦 <-- 呢d咪係八婆囉, 正經野又唔睇, 八掛野就記得)

因為Grace Hall Hemingway喜歡玫瑰花,
所以玄關同屋內都有不少玫瑰花裝潢。


這是大廳~~

因為Grace Hall Hemingway曾是音樂家, 故家中少不了鋼琴

書房
Hemingway爸爸係一個醫生, 所以屋企有好多標本,
但佢間房好黑, 冇影到~~~
 

主人房~

見唔見到左上第一張相呢?? 個位BB就係Emest Hemingway啦!
小時候生得似個女仔呢~~

很可能是Hemingway訓過的BB床

但, 導遊話部份物品都係彷製返出o黎的,
因為收藏係博物館內(!!)

Wednesday 17 October 2012

養小動物的責任 + 入手

上星期又去左朋友家中,
佢因為做義工的關係領養多一隻bunny回家,
係男仔, 兩歲大~~

(Hi~~你鐘意我對Smoky eyes嗎???)

佢天生右後腳向外生,
朋友見佢咁耐都冇人要,
就決定要領養佢啦......

雖然佢隻腳仔有事,
但都無礙佢活動同係家裡奔走!!

之不過有樣野我就好想係到講,
因為朋友話呢隻兔個前主人係話自己有敏感喎,
所以養左兩年就唔要佢~~

點解要兩年先知自己有敏感呢??
我就覺得係d人初初養見細細隻bb仔好得意所以養,
到大個左啦冇咁可愛加上佢隻腳向外生唔好睇,
加上又成日要洗籠, 梳理, 執屎等等覺得煩囉!

朋友話做義工個到好多兔仔被遺棄的原因都不外乎係因為冇時間照顧佢,
之前都有朋友話有d人遺棄寵物係因為要結婚, 生仔, 老婆/老公唔鐘意(!!)
更有人係同男/女朋友分左手所以唔要隻小動物,
其實聽完真係覺得佢地好仆街!!!

養一隻小動身其實係照顧一條生命,
佢唔係玩具, 佢有血有肉, 同樣需要人愛的,
唔係你一時好鐘意就拎返去養,
養一排覺得成日要幫佢執屎沖涼就話煩,
之後就搵藉口唔養佢。

知唔知咁樣係對一隻小動物好殘忍????

唔該, 養小動物之前真係好好諗一諗,
做好資料搜集, 準備好, 了解你想養的動物要點照顧先好養,
做個責任的主人!!

仲有最好唔好買囉,
乜絕純種又真係好重要咩??
其實去領養都係一個不錯的選擇。

(嗚....做乜指住我o黎話bor?? 最多下次唔敢抓你啦~~)
---------------------------------------------------------------------------------------------------------------------------

同埸加映 -- 最近不事生產, 買野就有。

我妹買了新的打蛋機~~是故又做左Brownie 俾我拎去探朋友~~

仲有呢個, 其實對呢個海錦寶寶卡通冇咩感覺, 但難得佢入面間隔合我心意,
見佢咁搶眼又抵就買佢啦~~下年終於有一本o岩心水的schedule用了~
唯一美中不足係 -- 佢都係由2012年9月開始, 我就慣左1月1日先開新的~~

呢隻係今年第一份收到的生日禮物, 由英國朋友係寄來, 早左成個月慶祝我! 係我至愛的MUSE!!!
雖然個人覺得呢隻唔係佢地BEST ALBUM但我都仲係好鐘意,
依家個腦成日都Loop住"ma ma ma ma mad mad mad......"







**食完藥, 好暈, 好眼訓.....但樓上又興建皇宮, 點算??

限期?

同不少人一樣無論學校做project, 返工做野, 生活瑣事都總係到差唔多deadline先肯郁手做.....

但好多女人仲好鐘意俾多個deadline自己 -- 就係要幾時幾時嫁!

早兩日舊同學約飯局, whatsapp有同學話到時會派炸彈。
今年都幾多朋友結婚, 至少都飲左兩餐係中學同學的, 仲有一單係舊同事,
眼見佢地都係結束愛情長跑(有對睇住佢地成12年, 我仲有份做姊妹)而結婚走入另一個人生階段我真係好為佢地開心。

之不過久唔久總有d多咀人問「幾時到你?」我就覺得好L麻煩(今次個whatsapp group都有),
通常都會話「我未玩夠, 唔想走入人生的墳墓住」。
而最痴拿膠線的係有D唔多熟的人懶醒提你「有仔趁嫩生呀」「女人青春好寶貴, 趁早好嫁」,
我通常連hea應都可以慳返。

之前五月係網上睇到十九子的一篇「破解港女之咒」, 我勁BUY。 是咁的:

港女恐懼「三十」大關,年滿二十五,即自覺標籤為「中女」,腦裏響起一座警報器,分秒倒數,須搶在三十歲前,成功「出貨」,結婚生子,外加一層物業「揸手」。
  但是智慧的民族,譬如法國人有一句名言:「優雅是成熟女人的特權」,英國的時尚專家也說,女人不到三十,莫想擁有自己的風格,三十歲非但不是末日,對於一個真正的女人,反而是開始。
  因為經過青春期的嘻嘻哈哈、二十來歲的跌跌撞撞,到了三十歲,為人處世,已漸得章法,喜惡愛憎,應已了然於胸,無知輕狂犯過的錯,可以拋諸腦後,知道自己是甚麼人,遠比嫁給一個面目模糊的男人,一起過下半生更為重要。港女的困局,純屬畫地為牢,自找的麻煩,只因為從小受世俗觀念的填鴨灌輸,只知成家立室的生存需要,不知還有探尋自我的人生意義;只知嫁得好等於家肥屋潤,從不解愛情或幸福之奧秘。由於毫無理性準備,這一代的港女,只能把過去十幾年來的幼稚,無限延長。
  真正的女人,像中國哲學家周國平說的,天生是生活的藝術家。到了甚麼年齡,就有甚麼樣的生活境界,這就是藝術。何況在這樣一個濁世,女人的哀愁,從《紅樓夢》的「千紅一哭,萬艷同悲」開始,是注定的。登高一級,看開一點,這不是鄉願式的自我麻痹,而是跟這個愚昧癡妄的社會,保持距離,做一個更好的自己,已經比其他人幸福。 文:陶傑
「我一定要XX歲之前嫁」呢D 低能的說話我聽唔少, 通常都唔會成功, 有D仲SEVE到核爆!
我有個舊同事就係一個人辦, 係另一個舊同事講俾我知~~
話說我當時入去呢間公司做野時條港女已經講到明恨30歲前嫁,
估唔到冇見幾年, 佢真係成功左! 仲可以話係超額完成
因為佢最後搞到一腳踏兩船, 睇下邊個男人娶佢先,
搞大左個肚個男人話結婚,
點知個男人又爛賭差人錢, 話多兩句仲想出手,
最後有日佢返屋企個男人掉晒佢d野出門口趕佢走,
個囡都未出世又要搞離婚又差D有抑鬱症, 有乜謂????
個男人仲講到明話唔要個囡囡跟自己姓。

呢件事你話佢好慘咩?? 幾啦, 但我覺得係佢咎由自取! 佢基本都冇了解過個男人, 純粹為左想結而結!

所以個句「知道自己是甚麼人,遠比嫁給一個面目模糊的男人,一起過下半生更為重要。」可以係一針見血~~

另外, 我亦見過有d女仔, 成日都以結婚為目標,
拍拖無耐又話結婚, 成日帶個男仔去睇咩結婚展, 婚紗展,
日提夜提, 知唔知好煩好大壓力ga???
我係個男仔都怕Q左你, 走夾唔抖啦!

有時我真係覺得依家d人思想仲老土過以前,
十八世紀大女作家 Jane Austen 都係單身一生,
二十世紀Beatrix Potter 都47歲先嫁俾William Heelis~~
但唔知點解21世紀o既香港反而25歲被人叫中女???
結左婚又要被人叫「師奶」,
我覺得依家D女人待遇反而仲差過300年前。

雖然我依家連所謂的「岸」都未上, 亦唔想上住,
阿媽教落「做女唔好過做婆?」 其實我都係咁諗。
有一個家庭就有責任,
有咩爽得過依家我鐘意掉低所有野拍下個臭屎忽去一頭半個月旅行??
如果結左婚有頭家, 唔洗你顧?
生左件仲慘, 見到佢地去行下街都搞到走難咁我就想死,
就算唔帶住個仔去旅行都要打返屋企問「佢今日有冇食野呀?食左D乜呀?聽唔聽話?有冇嘔呀?」
諗起就驚!!

以上睇o黎我呢D人都係心智未成熟更加不宜結婚生仔住~~~ 哈哈哈!!

兩個人相處其實唔止係間唔中食下飯, 每日都傾一次電話, 過時過節送下小禮物同一年去一兩次旅行就維繫到囉~~~

所以, 下次真係唔好再問我幾時結婚囉! 我會問返你係咪有好介紹ga!!!

關於限期, 我想說的是........

Monday 15 October 2012

cult 味濃 的Helter Skelter

周未, 看電影去,
整容天后 (Helter Skelter)是也!

可能因為被Trailer吸引,
結果期待太大~~
澤尻真的好漂亮呢, 而且演得很好,
但找那個水原希子來做一個驚為天人的美女也太扯了吧??
故事其實不錯, 只是, 有點拖太長了, 變悶了!
有幾個角色的演員和埸面, 令我心裡「媽聲四起」,
變成了cult味很重的AV(!!!)
果然是「你想看的, 都給你看」。

再來, 那個檢察官"懶型" + "懶有深度"的說話, 令我腦內不停響起 -- 「條友做乜勁野???」,
可以說是片中敗筆。

最喜歡的, 竟然是這部電影的化妝及色彩運用,
好漂亮啊!!!

我很膚淺, 我認!

**************************************************************************************************
同埸加映, 買了新的打蛋器, 舊的用了差不多6-7年, 壞了。
再去醫院探我舅舅, 情況不太理想,
人的生命果然很脆弱,
所以我們要變得更堅強!

Saturday 13 October 2012

蟹出沒注意

又到左食大閘蟹最佳時間,
由於我個妹訂左好多隻大閘蟹返o黎,
所以呢個星期都係不停咁食食食食~~
食左幾餐啦!!!




正所謂「九月圓臍十月尖」,
九月食圓臍=雌蟹,
十月食尖臍=雄蟹,
當然係以農曆計啦。
人地話母蟹膏黃多,
而公蟹就肉多肥美,
但我唔識分雌雄
總之有得食就得啦, 哈哈!!!

平時食蟹我就唔鐘意食膏的,
但唔知點解大閘蟹我就會食,
D膏好似特別正~~D肉又香, 好味!!


四葉妹妹: D蟹我捉o既!
(公仔是我妹的, 佢成日帶住去旅行)

四葉妹妹: 受死啦!!!!

(咁白痴o既野其實都係我個妹做)

BTW, 呢堆蟹都只係其中一半, 因為星三又返多幾隻(!!!)
好大仇口咁呢.......

不過呢, 由於我有敏感都唔敢食太多,
每次都係食一隻,
而且都冇飲住啤酒啦, 改飲薑茶。

冇計啦, 飲左酒會發得更勁ga!!
嗚......望住我個妹嘆啤酒, 真的很葡萄!!
(D蟹一定係飲左啤酒嘔晒泡了)

Wednesday 10 October 2012

人肉兩團圓

中秋前後飯局多,
上星期四都仲有飯局食,
因為有好友回港過節,
收工幾攰都要會一會啦!!

加上我同我妹最近想快D用完D食材,
密密做阿茷。


靚麼??? 這個是我焗的, 但我妹猛話好樣衰囉.....

入面係咁...係咖啡忌廉蛋糕!由於我d妹唔吼, 得我同爸爸媽咪食, 我要食埋佢地個份...好肥~~~

呢個係我妹整o既Brownie, 唔太甜, 很好~~所以我又食左唔止一舊(!!)
**順便一彈, 呢張影到咁濛o既相之唔係我個妹用佢個蘋果影ga囉...哼!**

再來, 我個妹買左我最鐘意食o既零食芝士粒粒....仲要係大手買入個隻, 忍唔住, 又食了一盒。

**拿, 我係an狗, 係咪影得好靚呀???**


還記得我中秋節食到肚痾做左痾清暉嗎??
話口未完, 上星期我已經因為食海鮮搞到個面又痕個咀又腫(!!)
依家個咀仲捐左,
但, 到左呢個大閘蟹o既最佳時機,
明知自己對殼類海產有敏感 (係近呢兩年咋喎),
都忍唔住口。

我個妹同我一樣咁鐘意大閘蟹,
所以就一次過訂左好多蟹蟹返o黎.......

陣間就有得食啦!!!

神呀, 點解你要咁對我????

以下係我同我朋友係面書吹水的節錄對話:


咁樣食法, 唯有, 再跟鄭大姐排汗吧。。。。。。

Saturday 6 October 2012

化已活的石硤尾舊式工廈

上星期一連四日假有咩好做呢??
除左賞花賞月賞秋香之外,
出街都怕多人ga。
你知啦, 大陸「黃金周」喎,
勁多大陸人落o黎喪拼,
我地都係避開去人多o既地方。
想去行山但又冇心冇力 (人廢, 冇計),
要遲d再涼d先去行山。


於是個妹捉左我去同佢吸收下藝術氣息(!!)
就係去石硤尾o既 -- 賽馬會創意藝術中心,
一共八層的舊式工廈已被活化。

(我妹: 頂你, 俾你影到好似危樓凶宅咁囉)
可惜我地去不逄時,
剛剛已完左手工藝市場展,
當日o既展覽不多,
呢個「失衡」已經係最有睇頭ga啦!!
 


(呢張係我最鐘意o既)

依家已經成為香港藝術友的小天地,
都算係一個唔錯o既選擇, 好過一味清拆起發水樓。
但如果政府投放更多資源就更好啦~~~
行完幾層, 我地緊係去左樓下間cafe hea下,
大佬, 個日我一早又跳完「鄭多燕」先出門口,
再行咁多層真係腳都軟呀,
食返個tea先走人啦。
如果有其他展覽再搞,
再來也不錯。