Pixar 25 years of animation -- 睇後尾枕展

琴日要睇兩套電影節電影,
倒屎咁早就要出去,
因為一套係早上10:30,
而另一套就係晚上9:50,
嘩, 中間成日流流長時間做乜好呢???

於是就去左沙田o既香港文化博物館睇PIXAR動畫25年展覽,
有胡迪啦, 有巴斯, 有毛毛, 有阿bu, 有超人特工隊等等,
諗起都開心, 點知,
滿心歡喜同期待,
換來係一肚氣!!!

係日本時同鬼鬼睇過宮崎峻o既動畫展,
有禮有守秩序o既日本人,
令我地可以好好欣賞同享受每一件展品,
因為人地好有次序地一個跟一個咁行, 逐幅作品靜靜地去睇,
等前一個睇完一幅佢地行開左, 下一個先會行上前睇,
而且館內不可以攝影o既, 真係冇人多手囉!!

可惜, 呢到係香港,
琴日入到去之後我以為自己去左花市(!!!)
每一幅展品都係擠滿一大堆人,
有家長為左俾小朋友唔洗淨係睇到pat pat,
會舉開個仔/女, 唔理會否踢到人,
亦有不少男士會好冇風度咁唔理你係老嫩一野撞開你,
再好有風度俾個女朋友行上前睇!!!

大佬, 你又係俾$20, 我又係俾$20,
點解你要阻止人睇野??
你知唔知我都係等左好耐先可以行到去幅畫面前ga???
我頭先望左好耐後尾枕啦!!!

你可以話你唔睇呢件可以睇第2d先,
但, 成個場都係好似你咁o既福街同埋龍友+智能手機黨.
個個停係幅畫面前死影爛影,
仲要係每一幅都要影喎!!
後面可憐o既職員苦勸唔可以影相都冇人聽.
更有家長係呢個時間教小朋友"如何攝影"(!!)
自己都其身不正, 日後如何教仔???

我都唔明點解睇還睇, 你要逐幅咁影呢??
你真的會逐幅睇返嗎???
我明你要upload上面書話俾人知你睇左啦,
但又洗唔洗逐幅都要人like呢???
話明唔可以影, 點解唔可以守下睇展覽應有o既禮貌?
出到外國映衰香港人就係呢d福街啦!!!

中間有一個展示動畫製作如何以速度來做出效果o既野,
係一個上面放左好多動畫角色, 由慢至快轉轉轉o既,
真係幾精彩ga, 如果可以好好睇到o既話.
可惜係, 唔可以囉!!
d人又係一大堆咁圍住係到,
影來影去又要影相又要拍片,
搞幾轉都唔肯走,
後面愈企愈多人,
個個都係到推推撞撞,
真係死左都唔知咩事!
令我更不解o既係,
好啦, 俾你影囉大佬,
但你洗唔洗同一段野要影3-4次呢?
你影完之後又要輪到你女友影喎, 返去兩個share唔得ga咩?
乜同一段影幾次影會影到唔同o既咩??
難道會多隻"阿凡達"ga咩???
痴拿膠線的......
更痴拿膠線o既係,
你影還影, 點解要加入旁白煩住人地睇野??
如: 嘩~~佢郁啦你睇....d企鵝一隻隻識跳ga!
小那星, 人地有眼都睇到啦, 洗乜Q你講呀??

最感同身受係走出展館後有個小朋友話: 睇pat pat展覽!!
姐姐都係"睇後尾枕展覽"咋陰公!!
睇完呢一part後已經冇晒心情,
可能要等遲d再去,
唔係等到時d冇品人死晒喎,
而係等冇咁多人貪新鮮去睇呀.....

BTW, 呢個展覽係由3/28 至7/11 ga,
如你唔係趕住upload上面書, 可以遲d睇,
唔係就會好似我地咁恨錯難返!

睇完都眼火爆,
要去搵雪糕食下火,
之後轉戰圖書館打發時間啦~~~