探訪Hemingway故居

好多朋友聽到我去左美國玩都只係羨慕我有得休息咁耐,
但講到文化方面, 好多人都不屑 -- 美國冇咩歷史同文化,
Well~~~我以前都有咁o既諗法, 因為北美的歷史太短, 只有二至三百年。
始終, 大家都會覺得去歐洲玩, 係比美國型棍好多。

其實, 美國佬都唔係一無可取o既,
相信好多人都知道二十世紀著名小說家Ernest Hemingway係美國人,
其實佢係芝加哥出生ga喎。

今次去美國芝加哥住左幾個月,
都去左睇睇~~

臨走之前一日, 鬼仔就帶左我去佢故屋啦,
佢出生於Oak Park, 係Chicago的西部,
個一帶有好多Prairie Style o既屋企,
除左去Hemingway故居,
我地都去左著名建築師 -- Frank Lloyd Wright舊居,
但由於我當日只係用手機影相,
而部手機係我一返到香港就唔見左, 所以冇相。

**依家Hemingway 故居的相片都係由鬼仔send返俾我的,
(佢有用自己手機影)
我返到香港成個幾月後先收到d相, 佢效率真高。**

細個有嘗試睇過《老人與海》,
但對當時唔識野o既我o黎講係好悶o既,
所以對於Hemingway都冇咩特別感覺,
只係知道佢拎過好多文學獎同做過記者等等......
最後係Idaho州自殺~~~
(當然佢o既感情生活又係好豐富啦 <-- 呢d咪係八婆囉, 正經野又唔睇, 八掛野就記得)

因為Grace Hall Hemingway喜歡玫瑰花,
所以玄關同屋內都有不少玫瑰花裝潢。

這是大廳~~

因為Grace Hall Hemingway曾是音樂家, 故家中少不了鋼琴

書房
Hemingway爸爸係一個醫生, 所以屋企有好多標本,
但佢間房好黑, 冇影到~~~

 

主人房~

見唔見到左上第一張相呢?? 個位BB就係Emest Hemingway啦!
小時候生得似個女仔呢~~

很可能是Hemingway訓過的BB床

但, 導遊話部份物品都係彷製返出o黎的,
因為收藏係博物館內(!!)

密食當三番

聽日中午我就離開芝加哥,
呢幾日好忙, 忙咩??
就係update好自己份resume同埋執行李囉!!

原來打算只留兩個月o既旅程最後變成四個月,
初初o黎係春天得負幾至幾度(!) 一堆冬天衫,
到左夏天除左買d, 屋企人又寄左幾件俾我啦,
大佬d洋妞size我真係carry唔到,
人地V領/大領, 胸前偉大大把野睇,
我呢?? 都大把野睇 -- 就係個bra連筋骨都見到囉!
(美國人d size 真係大, 我記得係英國玩時都去shopping幾次都有收獲)

加上係到又買左d書同一對鞋,
依家個喼閂唔埋,
唯有放棄一d舊衫囉~~

好彩我醒目, 最後將d衫以捲豬腸粉o既形式去入晒落一個大袋, 呵呵~~
不過, 仲未執完ga!

呢個星期係我最後一個星期係芝加哥,
所以就多左出去食飯, 嘩哈哈哈~~
鬼仔話等我有個美好回憶bor!!

印度野~~

德國野~~

泰國野~~

意大利野~~

但出街食得多都驚肥呀, 返香港捐完血就減啦,

費事d姑娘驚我唔夠重又捉我上磅!!

今日又去玩啦!
呢幾個月都好開心有你地於blog中相陪~~
如無意外, 回港再update~~

各位周未愉快!!

小學雞童年回憶 -- 可樂雞翼

記得細個媽咪都煮過下可樂雞翼,
但之後已經好多年冇食過,
因為雞翼多激素, 可樂又冇益。
之前整完醉雞後就諗起不如整下可樂雞啦,
反正之前飲淨兩罐可樂, 鬼仔又極少飲,
(正因如此我地6罐都飲左成個月未飲晒)
趁回港前用埋佢啦!

於是又上網搵左幾個食譜,
最後做D唔做D咁又搞左個比較容易o既出o黎,
咁難得, 我緊係要記底佢, 日後睇返啦!!

材料:
- 雞翼 <-- 很廢
- 紅蘿蔔（切段）x 1條 <-- 可以唔加, 但我覺得有D蔬菜又好似健康少少
- 薑 x 2片
- 蒜頭 x 3粒
- 可樂 x 2 罐 (其實一罐就得但我個d係細罐裝)

汁:
- 鼓油 x 2湯匙
- 酒 x 2湯匙
- 麻油 x 1 湯匙
- 糖少許

步驟:
1) 把雞翼洗凈, 用滾水煮約 2分鐘後撈起瀝乾。
2) 又用滾水煮一煮蘿蔔同瀝乾啦! <-- 其實可以唔洗, 但我鐘意佢林林地~~
3) 燒熱油鑊, 爆香薑片同蒜頭。
4) 再落雞翼。煎香翼加蘿蔔略炒, 再倒入調味料同可樂。用中火煮滾, 再以細火繼續煮約 20分鐘。要不時攪勻, 等雞翼平均顏色及熟透。食得!!

好開心, 有咩簡單過4個步驟我就食得丫, 嘩哈哈哈哈~~

一邊o也煮雞翼飲啤酒睇運動, 你都咪話唔爽 (當然下晝又要做運動減肥啦)。

其實由細到大我都係運動盲,
但係每次一到左四年一度o既奧運我都係咁狂熱,
日以繼夜, 夜以繼日地痴住電視睇比賽。

係美國睇奧運有好多條Channel都日播夜播,
唯一有少少唔滿意係D熱門項目, 亦係我最愛睇個D,
要等到夜晚先有重播, 朝早冇直播,
鬼仔話係因為呢個時間D人收左工多人睇喎。

有樣野好開心的係終於唔洗好似係香港時日夜狂講中國奪左幾多金,
我都明白當然每個國家會支持返自己國家o既運動員啦,
就好似美國都成日在播佢地比較有機會得獎o既項目,
而且都會著重訪問講返佢地自己友咁。

老老實實, 我都會支持返香港隊,
就好似一有單車同羽毛球等我都必睇,
前日有個體操動作以我地香港運動員命名我都好開心ga!!
我雖然咁唔鐘意大陸, 但作為一個港人,
唔多唔少心態上都會關心中國運動員表現,
特別係跳水, 射擊, 體操等等~~琴日見到體操男團同跳水, 我都睇得好緊張。

但我最唔鐘意係只係成日講中國隊乜乜乜, 中國隊物物物,
好似睇緊國內排名咁, 好煩。
最討厭o既係佢地只會關心係金牌方面,
銀牌同銅牌都好少提, 好似得唔到金牌個d唔係運動員咁!!
我覺得呢種行為好乞人憎, 人地台上一秒, 台下十年,
佢地就以一個金牌去衡量。
又好多時佢地得獎後o既言論都會令我好反感,
D民眾又係巴巴閉閉咁。
先唔講劉姓個件 (佢都未有份落埸),
但前兩日游水孫姓個位人兄,
佢訪問時竟然話: 「擊敗所有韓國人」(!!!)
大佬, 游下水啫, 洗唔洗國仇家恨咁款呀???
完全係顛覆奧運o既全球一心+體育精神,
又一強國“謙遜”特色。
我反而覺得外國o既運動員好得體,
通常講下得獎感受之外, 仲會話"It was fun"/ "We had a lot of fun"等~~
好明顯人地係當呢埸比賽真係Game。

最後, 我想話, 點解中國隊o既番茄炒蛋制服可以咁樣衰&娘??
李寧牌被人笑左十幾廿年都唔改, 真有性格。

充滿驚喜的奧運開幕

星期五鬼仔又係屋企返工,
可以一齊睇奧運開幕。

幾個鐘流流長緊係要搵D野咬下啦,
但冇咩材料, 又要自己整。

好彩, 醒起睇完Blog友o既Custard post,
我冇雲呢拿油呀, 冇得整住,
但見佢提到燉蛋;
諗諗下, 又夠快又夠簡單,
仲等鬼仔可以食多樣中式甜品, 一於整佢。

成世女只係中學時整過一次咁大把咋,
鬼叫平時咩係屋企咩都有媽咪煮咩~~
仲要係中一時第一堂家政堂整過o者, 都唔多記得點整。
好彩最後都俾我搞掂左, Yeah!!!

想凍食但由於時間關係,
冇時間等佢係雪櫝等佢凍,
唯有搵冰水坐凍佢啦, 哈哈!!
由於我用左佢d whiskey 杯,
等食時仲將一粒士多啤梨放上面整色整水,
鬼仔話呢個唔似中式野, 似chinese pudding喎。

真係捉蟲, 坐凍佢時又要邊抺走d倒汗水~~

(圖片來源 -- BBC NEWS http://www.bbc.co.uk/news/in-pictures-19020830)

講返個開幕禮,
嘩嘩嘩嘩~~以有限資金來搞真係搞得有聲有色,
而且好有故事性又有歷史意思, 仲充滿著英倫色彩呢~~
一開波以莎翁故事作背景, 再講起工業發展,
James Bond + Queen o既出埸真係有驚喜,
之後仲有JK Rowling, 又有Mr. Bean,
仲有家傳戶曉o既故事大壞蛋代表戰爭, 黑暗時期,
英國文學真係基根夠厚喔!!

再來一班青年人載歌載舞,
好似開party咁, 既有英倫電影發展,
有punk又有rock,
更有英倫搖滾代表人物 -- Paul McCartney~~正!!
呢d咪就係英倫文藝囉,
光是銀彈做唔到ga。

最開心係更有我超愛o既Arctic Monkeys演出呀!!!!
點可以唔俾一百分呢???
(有埋MUSE我俾200分, 哈哈~真大貪)

而鬼仔就話最鐘意係點聖火一part,
我都覺, 唔只因為有Beckham份,
佢地的出埸同交接真係好正,
個200幾枝好似花o既火炬逐漸點著再慢慢好升起,
更係好有創意同好靚丫,
仲有最尾個煙花都安排得好正, 目不暇給!!!

真係要佩服Danny Boyle, 以有限製造無限~
創意+幽默+經典一樣係咁有震撼感,
我好鐘意呢個開幕禮!!

好啦, 呢個周未去Milwaukee玩,
祝大家周未愉快!

準備睇奧運 + 笑話一則

唔經唔覺, 聽日就倫敦奧運開幕啦,
好似不久前先開始百日倒數,
估唔到咁快就已經到, 時間過得真快,
我都好快要回港了。(哈! 衰野就唔講住。)
仲有最開心係奧運主題曲Survival由我最愛o既MUSE唱!!
講返奧運, 最近因為奧運都多左好多有關o既產品,
提醒緊你奧運就到啦!
例如今日散完步, 入左Store買返我食開o既Cereal,
一拎上手, 背面 -- 變成咁,

唔...... 老老實實, 美國隊o既運動員淨係識Michael Phelps (!)
呢一版野我都冇個識。

另外, 行到可樂系列,

嘩~~又係一大堆奧運Version o既野。

英國已經舉辦過唔止一次, 所以好多野都會係翻新,
聽聞話唔會因而花費大筆巨額同搞無謂基建。
我一直最欣賞外國係活化, 善用同創意方面,
而唔係好似某"發展中國家"咁, 咩都要面, 咩都爭住認第一。
雖然好多人話北京個次開幕禮最好睇同最震撼,
但我都仲係對呢次開幕禮有d期待,
因為我覺得唔係樣樣野都要用金錢堆砌出o黎。
嘩, 大佬! 有錢到射咁多枝野上天等佢唔好落雨喎,
直頭係少林武功加唱歌跳舞啦, 咁都俾佢諗到。
其實我對北京奧運開幕冇咩好感,
可能當初期望個張導演玩色彩等等,
點知! 佢玩多人 (人喎, 中國大把啦)!! 吹漲~~
而且成個開幕仲燒錢到不得了, 更加唔鐘意。
(係我錯, 基本上自從《十面埋伏》後, 我唔應該再對張藝謀有咩期望;
聽聞佢最近又燒左一千八百萬人仔為高鐵拍左一部五分鐘的宣傳片)
基於對上一屆奧運我剛入了舊公司,
當時跟左一個痴筋上司,
搞到晚晚要被逼陪佢OT到十一, 二點,
有次仲要我星期六都返去做埋D kai野,
(依家諗起都仲心酸)
差唔多成個奧運都冇睇過直播賽事,
就連開幕都係睇重播。<-- 可能就係因為咁, 人人都講左內容係乜, 就冇左驚喜

今次終於可以睇直播, 而且d時間都還算okay丫,
唔洗捱眼訓, 所以好興奮ga!

鬼仔知道我唔鐘意中國大陸,
因為佢地派咁多人去參賽, 嬴左金牌就巴巴閉閉咁,
又由細到大都非人訓練, 練到人傷晒, 輸左就提都唔提,
佢地好興輸打嬴要, 我就好唔認同啦!
於是, 佢問我會唔會支持美國隊喎,
嘻嘻! 我實話會啦。
反正奧運我冇話特別鐘意邊個國家/ 邊個運動員 (有都退左役了)。
講左咁耐, 大家又鐘意睇d咩奧運賽事呢??
我鐘意個d都好熱門ga,
- 競技體操 (最鐘意俄羅斯, 通常靚到公仔咁)
- 跳水
- 游水
- 乒乓波
- 女排 (男排咪搞, 個個力的表現)
- 短跑 + 跳遠
- 射擊
- 羽毛球
其實仲有好多都會睇, 但最主要就睇呢幾樣,
反而冇左足球喎, 哈哈, 因為少左好多巨星丫嘛, 世界盃好睇d。
*********************************************************************************
仲有一單白痴野講講,
話說友人的公司之前有好多人離職,
所以就收到好多goodbye e-mail出o黎,
有d仲懶到會copy一樣o既內容tim。
收得多, 而且又唔多識o既同事, 通常都唔會細睇ga啦,
點知友人一係唔睇, 一睇就笑爆咀。
有日佢收到一封, 香港同事o既,
劈頭第一句: "It seems to be just yesterday that I crossed HK's border for the first time"
大佬, 你copy唔係問題, 但問題係你是香港同事呀!
條友真唔消化下就send出街啦。

真係面就人地俾, 架就自己拎黎丟。

丫!! 咪住~~可能佢家住深圳, 每日都過關返o黎香港上班掛.......

散步行到一身汗, 返到屋企又補充返消耗左o既脂肪.....哈哈!

我最鐘意薄荷味~~

好啦, 準備去食飯~~

東西居住大不同

呢樹有個節目我同鬼仔都幾鐘意睇 -- House Hunter International,
(有非International版本的)
內容講乜呢?
通常係每集都講一個家庭/人要由原居地搬去另一個城市, 東南西北, 大江南北咩地方都有,
一集之內佢地會搵當地o既經紀按照佢地的資金同需求,
帶佢地去睇三間屋, 身為觀眾o既你緊係陪住佢地睇樓啦,
最後佢地要於三間屋之中揀一間咁。
鬼仔話好耐之前有一集係講一對夫婦搬去香港,
一邊睇一邊驚訝香港d樓價貴到癲, 但地方又細, 環境又差,
仲話有間屋個窗係對住另一個窗ga wor!

我心諗: 大驚小怪, 香港地大把人都係住緊發水樓同可以伸手問對面屋借鹽ga啦!!
香港房屋政策同大家有咩問題, 我冇打算係到探討, 有苦自己知。

咁今次講咩呢??

我大城里出城, o黎到亞美利加想記底大家居住文化o既不同。

記得以前香港工作個到有座商業大樓, 好新淨ga,
但因為其中有一面o既單位都係對住墳埸,
所以個一忽好多單位都冇公司租或買。

其實, 唔只商廈, 唔少香港人如果住係墳埸附近都話唔老黎ga,
好似我香港屋企向山, 望到不少山墳, 以前有親友o黎過,
都話咁樣係唔好ga wor!!
但我地一家住左咁多年都不錯丫 (touch wood)!!
莫講話墳場啦, 淨係睇我地搞建骨灰龕都被人反對到媽媽聲就知啦!!
(叫個d反對o既人一係咪就咪Q死呀, 一係就要死死遠d, 唔係死左冇地方俾佢ga!)

相反, 係外國, 不時都會見到墳場附近有民居,
就連我上次去鬼仔家姐屋企, 佢家姐住個屋苑都有成排係對正墳場ga。
我同鬼仔講, 俾著香港一定會好少人買, 一係就要超平;
相反, 老外一係就唔信有鬼 (me too), 信o既就覺得要同靈界共存,
所以, 好多老外都唔介意近墳埸 (當然都有例外啦)。

另一樣野, 我地香港地, 地少人多,
d樓緊係向高空發展,
基於種種原因 (例如避開底下o既鬧市, 圾垃房, 蚊虫等等),
我地寧願住愈高層愈好。
但係外國, 若非住幾廿層的高樓大廈,
不少人都鐘意住底層, 最好就連埋花園,
緊係啦, 人地地方大, d住宅得幾層, 冇lift都唔會要行餐死, 一係就遠離鬧市......
如果係香港, 住得高而且冇lift, 你都咪話唔死。

最後一樣, 香港好多人好介意o既「西斜」,
不少老外不知幾鐘意, 因為佢地夏天比較短,
日照時間少, 所以間屋多陽光入屋, 佢地會好鐘意!!
鬼仔爸爸個女朋友就係咁啦, 夏天一到成日出露台曬太陽曬個夠,
唔甩皮都唔收手。

(呢樣又同唔少香港見光死o既女仔相反, 第日再講)

不過, 有樣野老外同我地都好鐘意o既就係 -- 背山面海,
所以就算住唔到咁o既絕境,
一到長假期佢地都好鐘意去有海的地方,
而短假期都好多人鐘意去行山。
同我地一樣!!!

**張相間屋其實唔多關事, 但冇相又好似好吉咁, 就出賣左人地間屋啦~~
-------------------------------------------------------------------------------------------------
最近樓上搬來了一對精力旺盛的新租客,
一大清早就傳來兩口子歡愉之樂的聲音(!),
事後他們整天都搬動傢俬,
晚上十一點半時他們仍在呯呯嘭嘭的腳步聲,
要知道木屋是很傳聲的, 我就像生活於馬埸底下。
唔多夠訓........

呃鬼食豆腐 + 醉雞

雖然被我d妹串完, 叫我整賴尿牛丸,
但我份人就係你愈話我就愈要做ga啦。
就正如早幾年我去英國遊玩,
因為連煎蛋都唔識,
而被一個我男仔話: I feel so sorry for your future husband.
所以不論係西餐還是蛋糕, 我呢幾年都不時會練習煮食 (因為佢係BBC, 故我以西餐為主)。
證明俾佢睇我係識食野食o既!!!

依幾個月係美國, 鬼仔不時都好期待我整d中餐俾佢食,
早幾日係Chinatown食完點心 (好耐冇食過啦, 個間野竟然仲有點心車, 我實在有d不知所措),
竟然俾我買到花雕酒乙枝, 又有鬼仔做白老鼠, 於是又試左新野兼呃鬼食下啦~~

由於網上搵到o既食譜十幾廿款, 我決定要記得我自己最後簡化出o黎o既一個 (懶嘛):

1) 花雕雞翼:
平時係香港我勁鐘意食媽咪煮o既醉雞, 但成隻雞我唔識處理, 反正只係試試, 就用鬼仔之前剩餘的全雞翼啦!

- 先將雞翼解凍, 洗淨, 加少少鹽及麻油醃一醃約半小時。
- 蒸雞翼, 約8-10分鐘, 蒸出來的雞汁準用。
- 再將雞翼煮至全熟 (我怕死, 驚蒸唔熟), 然後撈起雞翼放入冰水中。
- 準備花雕酒, 杞子一把, 紅棗數粒, 魚露少許及糖少許, 再加埋雞汁, 煮一煮滾。
- 於雞翼中間界一界, 然後放於酒汁中, 待涼雪凍至4小時。

呢個係我睇左好多個食譜, 睇到心都煩埋自己再搞o既,
因為有d叫你煮, 有d又叫你蒸; 一係有d又話用李氏醉雞汁(!), 有d又話用雞粉,
有個仲用左花雕+米酒+紹興酒再加醉雞汁, 對於中菜白痴的我o黎講,
絕對複雜過張無忌配「七蟲七草花」解藥。

成果, 都唔錯, 好入味, 好好味!! 鬼仔食到連隻尖都唔放過。

不過我當時煮緊豆腐, 叫鬼仔將d雞翼上碟,
好日唔見佢咁好手尾, 一野倒晒我d汁,
嗚...... 我d杞子呀....... 人地好鐘意食ga嘛。

2) 蝦仁蒸豆腐:

- 先將蝦仁解凍 (冇計, 呢樹咩都急凍), 洗淨, 再以少許麻油+鹽醃一醃。
- 呢個時候就將d豆腐切片, 將佢地蒸2分鐘, 待用。
- 再切好蒜蓉及蔥。
- 蝦仁以滾水煮至8分熟。
- 打一隻蛋白跟蝦仁伴勻, 再於每一片豆腐上放一粒蝦仁, 加入蒜蓉一齊再蒸6-8分鐘。
- 上碟時淋上豉油及灑上蔥花, 食得。

遺憾 -- D老外豆腐唔滑ga, 返香港再試下搵d滑滑豆腐整多次~~

俾人鬧仲笑笑口??

(琴日路過時亂影的, 跟本post其實無關, 純粹覺得咁樣好似有霸氣d)

相信係香港都有唔少人試過入左D有乜乜食評人去過就串串貢 (我本來好想用數字形容) 的食店,
食餐飯都要被人(堅)無I禮對待一肚氣,
但琴日我同鬼仔去歎完點心,
係downtown四圍逛後, 入左一間bar歇腳飲野,
結果唔夠幾個鐘, 我地決定夜晚再去多次食晚餐, 一日去兩次!!!
因為我地實在太鐘意被呢間bar的人鬧啦!!!

間bar就係呢到...

o既下層......

望住條河~~

放心, 我唔係痴左線~~

事實係呢間bar 的服務員sell性格 + 搞笑,
一入到去等人帶位就會有人聲大夾惡問你幾多位 (當然佢係玩玩下ga啦),
再o黎係負責招呼你的服務生一野掉底d餐具落你個位。
由於琴日下晝我地想睇河景於是坐左出面,
個哥哥一腳棟係我地張長椅到問你想要乜,
但佢地落單唔洗寫又唔會搞錯先勁,
仲要次次埋你問你野都好大聲咁呼喝你(又係玩個隻),
個個客人被佢地喝完之後都係會好開心。 <-- 看, 痴線的人其實很多!

例如我後面有個男人係佢大聲派餐時話: I like the way you speak. So I can hear you.
之後個侍應遞杯啤酒俾佢話: I know, shut up dude.
仲有佢個老婆唔知講左乜之後個侍應好大聲話: I do what I want, understand?

又例如我點酒時佢要check id card, 到你俾左佢睇之後佢會扮晒野大聲話: It is fake!!!
(放心, 佢轉個頭會俾啤酒你)

另一個女服務生, 人地埋單佢收錢時會講: Okay, get out of here you guys.
我真係笑到癲~~

咪以為呢到個個粗聲粗氣就服務唔好喎,
佢地服務好ga, 只係鐘意同客人搞下笑, 懶晒惡死咁。
「我大聲唔代表我無禮貌」 咪就係咁囉!

到夜晚我地再去時, 下晝個服務生認得我,
仲話: You guys are so queer.
鬼仔即刻話: We just want to get rid of you.
之後佢大笑行開~~

晚餐食左乜? 唔好期望呢到食物有咩特別,
都係一般bar的野食, 發氣野多, 而且不太健康,
但去呢到過下生日, 或感受下被人鬧仲笑笑口o既感覺幾好!!

佢地個餐牌, 會搬過o黎俾你揀~

JUNK FOOD~~

最正係, 如果坐室內佢地會每個客人都有一頂paper hat俾你戴住o黎食飯,

係佢地d服務生親手摺, 仲會親自寫畫~~

個個都唔同, 有d會係上面加多個汽球, 有d會係上面畫畫~~
我同鬼仔個兩頂係:
1) I have small egg roll!
2) I love his small egg roll!

隔離檯個d仲抵死, 例如有:
- Boys hate me. (一個靚女wor)
- I miss college (係一個阿叔喎)
- I am stupid      ↓ (指住條友)
- I'm with stupid. ← (指住隔離條友)

最搞野係佢地個廁所,
男女廁o既門後面都係調轉,
明明入去時係 -- "Ladies",
但你走個時會發現個門明有個"MEN"牌,
等你以為自己去錯廁所(!!)
係咪好鬼抵死呢???

呢間野叫 -- Dick's Last Resort.
夜晚仲有live band ga,
有興趣去俾人鬧下可以去:
http://www.dickslastresort.com/domains/myrtlebeach/menus.htm
************************************************************************************
除左被人鬧, 今個周未仲做左d乜呢??
我去左睇batman啦,
更收到不少朋友關心o既msg,
如:
- 有事記得要用爬的
- 唔好以為係4D
- 買左避陣衣未?
等等....... 好彩冇痴線佬咋!!

成日話我過份擔心,
但你睇, 美國真係好多痴線佬,
希望死者得以安息,
仲有快d送個癲佬上電椅 (唔好曬米飯養佢)。

套戲呢~~可能之前聽人市超好睇乜乜物物,
搞到期望太高, 我覺得唔算超好睇喎~~
不過都值得一睇o既。
(Catwoman 好索)

btw, 呢到唔興買飛時劃位,
我地趕頭趕命買飛入去,
free sitting, 搞到坐到好前....... 畫面好震撼(!)