Jazz Festival in Montreal

其實未去到Montreal之前已經知道我地去個幾日剛好撞正Jazz Festival,
以前聽就聽得多, 所以都想親身去感受一下~~

我地下榻o既酒店附近幾條街都係咁樣,
個到一帶幾條街都有宣傳/廣告,
好大陣仗ga!!

呢本野係酒店拎o既,
我地睇個晚就有幸睇到佢o既表演, 超開心呀~~~
由於唔係每一個活動都要科水,
所以我地係Montreal hea 遊的最後一晚都有去!

日頭一轉,氣氛好好!!! 

老外o既大型活動緊係有啤酒啦~~仲有CD shop俾你買碟ga!!

夜晚又再去!!

雖然我係聽開Rock Music,
Jazz唔係我杯茶, 但都知道Dawn Tyler Watson係邊個o既,
其實個晚唔只佢ga, 仲有好隊band同歌手玩ga,
我都聽得好開心, 好投入!!

如果俾我睇到埋 David Gogo 就更開心~~佢手結他超正!

行左成朝仲企+跳左成晚,
對腳真係好攰呀!!!

夜晚個埸就企得遠d啦~~冇日頭咁好彩!

睇後感 -- 有機會真係要去睇下, 感受一下, 好正!!
****************************************************************************************************
同埸加映, 有街頭表演睇ga, 呢個靚女好好身手!!

Chateau Dufresne - 既看裸女也看B

又返返去加拿大之旅~~~

除左行花園, 我地又去左睇人地故居,
呢個故居叫 Chateau Dufresne,
要科水ga, 基本上呢個加拿大之旅樣樣野都係要科水,
不過最平係佢 CAD 7.00, 任你行任你睇, 仲可以影相。

樓下有靚仔工作人員問我知唔知道呢地方的history,
嘩~~駁靚仔為我介紹, 我緊係幾大都話唔識啦!
(而事實係我堅係唔知道佢地係乜水, 我地只係路過的)
於是阿靚仔就用佢勁重口音的英語講解一下。

原來呢到係屬於Marius Dufresne 同 Oscar Dufresen 兩兄弟的故居,
佢地爸爸係二十世紀顯赫的法裔加拿大企業家,
此故居由1915年起到到1918年, 再被分為兩個獨立家庭, 兩兄弟一人住一邊。 <-- 係咪唔妥對方呢???呢樹亦係由巴黎建築師Jules Renard根據法國凡爾賽宮採用Gothic式風格設計, 而豪宅室內裝飾用左一系列精美的壁畫同Stained glass等就由Guido Nincher於1920年代造成;
依家就成為一個歷史博物館展出美術學院作品同佢地大宅的建築及古董家具, 1976年由省政府豐碑。

雖然都係以Gothic式同天主教色彩設計, 但由於分左兩個家庭居住, 入到去可以見到佢地裝修o既不同風格~~
首先係Oscar Dufresne 的住宅, 我發現佢屋企o既設計, 不論係壁畫, 掛畫定係擺設都有祼女,
我估.......佢好鐘意祼女!!

就咁睇, 冇咩特別呢......抬頭一望~~

呢到又有~~

呢到都有....

連壁爐都有......再望......
呢間房有兩個咁o既大櫃, 有琳瑯滿目的餐具~~

咁樣睇係咪已經好靚呢?? 嘿嘿.....望真d, 內有乾坤ga。 上面都有精雕細啄o既 3D 祼女!!!

佢真係好識享受。
一邊high tea, 一邊眼+手都有美女相伴!! 仲有好幾套都有祼女ga~~

而我就鐘意呢套, 實而不華~~

行到另一個兄弟 -- Marius Dufresne 的住所,
我就比較鐘意...... 但呢邊好多畫同擺設係以嬰兒為主,
我冇咩點影, 因為我覺得勁似d 胎死腹中個d咁.....有d恐怖~~

簡約的裝潢~~仲有書睇, 好有文藝氣息 (似我...... 嘔嗎??)

前面個舊係乜呢??

我諗應該係一舊健身器材掛.......唔通係酷刑器咩? (都幾似......)

呢個係佢書房, 好黑喎.....

天花, 好靚~~

呢個係交誼廳

仲有部靚靚鋼琴

呢個都好靚~~
而我覺得最正係呢個圓拱形的飯廳

噢......影得太衰, 原圖係咁:

華麗的燭台

仲有一張放滿人像畫o既茶几~~ (咁多人向上望住自己都幾驚)

豪宅又點少得大條大螺旋形樓梯呢??

下面個層仲有野睇ga~~話明會不定期展出美術學院的作品~~

化妝舞會下次可以參考下呢個look~~
今次仲係女人最愛的手飾, 好鬼靚呀!!!

閒逛埋佢個花園......係到用祼女茶具high tea都唔錯~~

你地又鐘意兩兄弟邊個的居所呢???

繁花似"咁"的Montreal Botanical Garden

好! 冇神神又好跳TONE地返回我o既hea遊加拿大之旅。

咪以為我唔識"錦"字喎,
我呢個"咁"只係形容我影相影得衰咋!

前一日去完Olympic Park,

隔離仲有一個Jardin botanique (英文名係:Montreal Botanical Garden),
我同鬼仔都好想行, 由於應該會花好多時間,
所以決定第二日再o黎呢個站。
要科水ga -- CAD $12 -- 16.50,
之前個日套票冇買埋佢(張野又唔可以分兩日),
如果你鐘意一日走馬看花行晒好多個地方就可以買埋套票喔。

呢個花園有成75 hectares咁大,
係Quebec最大的植物公園,
內有戶外主題花園及溫室,
除左係加拿大國家歷史遺址,
2008年仲成為左世界最大的植物公園之一。
花園始建於1931年, 當時係經濟大蕭條,
經過當時市長Camillien Houde 同Marie-Victorin兄弟爭左多年而投得。
由 Henry Teuscher 設計, 而行政大樓的裝飾藝術風格就由建築師Lucien F. Keroack設計。
淨係行溫室同埋睇呢個花園o既歷史資料館都行左個幾兩個鐘,
因為真係種類繁多, 除左有歐美植物, 仲有南美, 非洲及亞洲等o既植物,
真係生多對眼都有排睇丫!!

亦有仙人掌, 有d大個人頭, 仲有d就高到樹咁

其實佢地本來係一朵朵心心形ga, 但係佢地大堆頭咁生出o反, 依家咁睇係咪好似燈籠??

仲有盆景~~

竹林~~

行完溫室, 仲有戶外大花園,

入去之前工作人員會check你飛同給個豬印係你手到,
因為呢個花園太大,園內仲有多個園區,  唔係一時三刻行得晒,
預你會出一出去食lunch/抖抖。
(記得拎住份地圖, 唔驚行錯路嘛!)
有乜主打呢??
- The Chinese Garden
- The Japanese Garden
- The First Nations Garden
- The Alpine Garden

一入去就有個Rose Garden, 好多唔同品種o既玫瑰花/ 薔薇,

開得又大又靚~~

呢d近鏡都係我冒住生命危險影o既, 因為好多蜜蜂喔~~
阿媽教落, 見到蜜蜂緊係要企定定唔好郁~~
但可惜鬼仔係有蜜蜂敏感症ga, 蜜蜂針到後如果唔立即送去醫院打針,
就會唔知幾多分鐘後死ga啦!!

而呢個獅子我唔知有咩作用, 淨係令我諗起某香港紙幣 (發錢寒)。

o黎到呢個Chinese Garden......d老外好鬼鐘意ga!!

呢對石獅子, 老外們勁like, 個個爭住影相,
鬼仔見咩問咩, 一時又問「夢湖園」點解呀,
一時又問呢d石獅子係做乜, 我要解答, 好忙。
我解釋俾鬼仔知石獅子係一男一女等於中國人成日講o既陰陽,
佢又要問, 邊隻係男, 邊隻係女?? <-- 煩死人,
男仔會有個波係手 (唔知繡球英文係乜, 老作), 女o既就有隻baby的......
而最頂癮o既係, 我解答o既同時, 後面個幾個老外一家大細都專心咁聽, 仲點晒頭()

中式園林好靚,
記得細個去蘇州 -- 網師園參觀時,
個導遊話古代d大戶人家唔會俾閨女出街,
於是家中的花園就有齊春夏秋冬的植物, 等佢地一年四季都有野睇。 <-- 俾我一定悶到痴左!!

仲有荷塘

入到去, 好彩有呢個小小書法博物館,
老外們也很喜歡, 還好入面有專人解答問題同有晒註解,
鬼仔淨係問我有冇學過o者。
(有呀, 細個小學時中文科必學啦, 我仲參加埋學內課外活動 -- 中文書法, 但玩左兩年冇玩了)
我個人認為, 用傳統書法寫殘體字係好九唔撘八又毫無美感的。

食完lunch, 行到呢個Japanese Garden,
入面有咩睇呢, 有日本的紙藝術,
埸刊有list返唔同日子有咩活動俾大家參加 (有茶道ga, 但好似要另外俾錢),
我地個日就有得學用日本花布包裝d酒啦, 飯盒等等。
我係個一埸唯一一個亞洲人, 學包酒瓶,
鬼仔同另一個女同學都唔知點解, 打個結都要人解釋幾次,
我就好叻女咁做得最快同最靚, 連阿Sir都讚我Well done!! 呵呵呵~~

另一埸係包便當, d老外學員都係一樣好困難咁, 個紮住頭髮的亞洲女仔,
同我一樣都係最快~~都唔洗人解釋多過一次。
真係唔明對d外國人o黎講有咩咁難呢??

仲有一個關於日本和紙藝術的展覽

油紙遮~~

靚麼??? 紙造ga!!

另外, 我地仲參加左一個room tea tour, <--都唔洗錢o既
丫, 以為有茶飲下, 點知原來係講日本花園種種裝飾的意思,
如: 涼亭, 可以係等待同思考; 仲有泉水, 係可以清洗大家心靈等等......

之後其他的garden因為都好攰啦, 行到腳仔軟,
加上又錯過左其中一個tour時間,
我地都係好hea咁睇, 所以冇咩影相, 哈哈!!

真係行到你瘦......

成30+度, 仲鬼咁好陽光,
明明都用左sunscreen,
行完晒成個花園之後, 鬼仔成隻乳豬咁紅卜卜,
而我就黑左好多.......
開始擔心回港時海關認不出我就係相中人了~~~