談生活，談電影

由於腳傷已經好返好多，

上兩星期同朋友去行山，

香港仔水塘一段，易行，

而且就嚟春天，繁花盛開，

風景唔錯架。

衛生意識很重要

最近幾日新聞都成日講中東o既新病毒,
大家都煞有介事咁,
屋企大廈同公司大廈個每幾小時消毒電梯制一次又加密左,
警覺性又提高返。

個人覺得其實沙士之後香港地大家o既衛生意識係高左,
雖然沙士時仲係學生妹, 但個一年真係好難忘.
每日返到屋企睇新聞都講邊到有人感染, 幾多人死左, 邊到要隔離。
仲有好多畫面依家諗起都覺得心酸~~~

相信有唔少人依家都會返到屋企即刻洗手,
生病時好多人都會習慣戴返個口罩, 以免傳俾人地。
(當然亦都係OFFICE入面提醒人佢病左, 第二日唔返唔好話我扮野啦)

(我妹的手~~)

出完街一定第一時間洗手,
食野之前又會洗手,
摸完錢或者D污糟野緊係都要洗手啦。

(see??? 好污糟ga)
就連係圖書館借書, 我都會返屋企用消毒藥水抺完先肯睇~~
鬼仔成日都笑我有潔癖!!!

大佬出左街成日, 摸左咁多野,
返到屋企第一時間緊係洗手啦,
d銀紙同書又唔知幾多個人摸過, 緊係又要洗手同清潔啦!
係咪先???

對於我地o黎講, 病左去睇醫生, 係好正常,
但老外們又是驚訝, 因為呢D小病佢地都認為會自動痊癒,
唔得?? 飲一杯威士忌再沖個熱水涼就搞掂ga啦!!

其實除左鬼仔, 係不少老外眼中呢d行為係非常白痴兼大驚小怪o既,
就好似前兩年豬流感, 係歐洲肆虐,
我最記得當時返AF學法文, 佢地樓下有個電視,
都有播返法國雹視台, 有晚經過,
個廣告叫人係公眾地方要注意乜乜物物,
要同人握手後都要記得洗手,
但係冇提人見面時唔好錫錫ga wor!!

我明白, 因為我地香港地地少人多,
而佢地外國地多人少, 人口密度相對我地香港低好多,
加上我地係人煙稠密o既城市,
係不少公共埸所, 交通工具等等都係一大堆人,
亙相傳染o既機會更大。

好似係公司, 流感高風期,
有一個同事病左就會大家輪住病ga。

所以大家記得要學董太 -- 洗手洗手洗手!!
***********************************************************************************
講單鬼仔私事件俾大家知:

仲係芝加哥時, 有日一齊去左公園散步,
鬼仔無啦啦都會搞到跌隱形眼鏡,
幾經辛苦搵返, 但冇眼藥水洗洗喎,
點知條友二話不說,
竟然斯斯然用條脷lum 一lum個隱形眼鏡,
之後就放返上眼(!!)
我真係睇到眼都凸埋丫!!!

佢o既理論係, 眼睛同脷分泌出o黎o既液體係一樣ga。大佬, 眼睛同口水o既細菌唔一樣囉!!!


成日笑我地怕死,
但你有你話, 我就覺得佢地危機/ 衛生意識冇我地咁高。
如果唔係之前點會係槍擊案,
個犯拋左煙霧彈入去同開槍,
竟然都有人以為係首映特別效果丫???
我咁怕死, 緊係第一時間會趴底走人啦/扮死啦~~

防曬美白大不同

好耐冇寫過東西大不同~~~

講左幾日反洗腦, 輕鬆一下啦, 由於我妹最近去完泰國旅遊, 但就竟然可以一D都冇黑返o黎香港~~
就係咁, 係到講下香港人同外國人對美白o既不同啦!

中國人有句說話「一白遮三醜」,
我同另一個妹呢d由細到大一到夏天都係成日去游水o既人,
總是一身小麥膚色,
次次聽到人地咁講我都會話「我就係靚到無醜好遮所以曬黑自己」。 <-- 係咪好想嘔呀??? 我咁講之後d人就會收口ga啦!!

係呢到等我出賣下我個妹啦, 睇下佢出完海玩都可以唔黑,
究竟我父母製造我時係咪基因突變呢??
我一曬就好易黑ga啦,
成個泰妹咁架喎!!

o係香港出街, 通常都會見到d女人 (唔係女仔喎)一定會擔遮,
最憎見到佢明明係簷蓬底下都仲擔, 阻住晒,
有時多人係到, 真係好驚俾佢隊親眼,
有時嬲起上o黎老納真係恨不得一掌推開佢把遮。

就算d女仔唔擔遮都會揸防曬,
我有戶外活動都會揸ga, 驚會生皮膚癌丫嘛!
平時出街呢, 就記得先用啦~~~哈哈!!

**唔係賣廣告, 我求其搵屋企有o既防曬用品影ga咋**

我以前中學時有個靚女同學,
佢一定會係d有陰影o既地方下行,
以免陽光, 所以佢真係好白,
諗返起, 佢當時係好多男女同學o既女神~~

我亦有朋友試過同佢女朋友去泰國諗住享受一下陽光與海灘,
點知個女仔成日都話怕曬, 要留係室內, 去o黎都無謂。
仲試過帶佢去行山, 著黑衫黑褲 (仲要長袖),
搞到差d中暑咁滯, 又要照顧埋佢一份。

但係美加, 仲有我個妹話係澳洲 (佢去左working holiday),
d外國人, 不論老嫩, 十之八九佢地真係好鐘意曬太陽!
有d唔用防曬之餘, 仲會搵標榜Bronze o既太陽油,
同埋Bronze body lotion o黎揸,
總之就有咁黑得咁黑, 追求蜜糖/小麥一樣o既膚色。
除左我上次係芝加哥想搵有美白成份o既body lotion都得個吉外,
我都冇係美國見過好似香港咁成日有美白產品o既廣告。

返到香港就有美白BODY LOTION啦~~

其實外國夏天短, 佢地好珍惜有陽光o既時間,
好似鬼仔爸爸個女朋友咁, 一到夏天就坐係佢屋企個露台曬曬曬,
仲有之前係芝加哥時隔離屋個女人, 都係成日坐係花園, 日曬夜曬, (我也很無聊, 經常監視鄰居)
係公園時仲有好多人都會好似曬咸魚咁, 訓晒係到狂曬,
就算出街食飯, 只要間餐廳有露天座位佢地都實揀坐外面,
個個唔甩皮都唔收手。

但佢白人比我地亞洲人更易出斑斑,
所以d洋妞都係細細個已搞到成身/面都雀斑,
就好似Lindsay Lohan 咁, 有冇睇過佢素顏相?? 嚇鬼死你!!

過份曝曬, 曬得多皮膚好易老化,
所以d洋妞除左多雀斑之外,
佢地好多時廿幾歲已經望落好老,
老個d女人更加恐怖, 雞皮鴨殼咁,
d紋仲多到好似用蜘蛛網做mask咁,
都咪話唔嚇死人!

曬太陽呢方面我就覺得同飲食一樣, 都要適可而止,
其實, 人體九成以上的維他命D來自日曬,
只要唔過份曝曬絕對好處多過壞處o既,
因為可以預防骨質疏鬆, 多發性硬化症, 風濕/關節炎仲有抑鬱等等~~

雖然, 皮膚白有白o既好睇,
但如果當左自己係彊屍, 見光死, 一樣唔多好ga,
就好似陳皮咁都要曬一曬, 吸收一下適當o既陽光, 對人體好ga!!

過份依賴的 Food waste disposer

返到o黎香港之後煮野食時先記得自己剛去美國時有樣不習慣o既野,
係美國, Food waste disposer 呢樣野係都好普遍。
係香港時煮食/ 食完o既殘渣, 或D用唔著o既廚餘等等~~
由於我屋苑都冇廚餘收集, 所以固體緊係要於去水位搵野隔住,
又或者直接倒入垃圾桶啦。
唔係就會塞住去水位ga嘛!!

而係美國, 因為十間有九間屋都有Food waste disposer (係咪叫食物殘渣處理器呢?),
於是通常個d食物殘渣都會就咁掉入個Sink盆到,
一開水佢地就會沖左個去水口啦 (廢話),
之後你再撳一撳個制開著個Food waste disposer就會攬碎晒d野再沖走啦。
係咪好方便呢???

就係咁, 因為太過依賴, 慣左手, 先幾日要提醒自己,
如果唔係搞成好似Duplex 以下呢一幕咁, 就嘔死啦!!


講起撳o個個制, 北美o既電制同我地香港慣常o既電制樣都有少少唔同,
我地o既燈制係啪o既多, 而佢地就係剔上剔落咁,
有個好處係就算手濕, 減低少掂到電流可低少觸電機會。

大鄉里出城 -- 洗車

一日兩篇, 是咪好勁呢??
呢個係存貨o黎ga, 之前都唔記得出.......
依家要執行李準備返歸, 我緊係要出埋佢啦!

由於我冇車牌, 所以冇養車啦,
而我全家得媽咪同細細妹有車牌,
一個有車牌30+年都冇開過車(!),
另一個就係新牌仔(!!)
所以我地都從無養過車,
亦冇洗過車!!

而我呢個大鄉里心目中o既洗車,
就係好似 Cameron Diaz 咁,
當然, 換成我的話絕對係會被人打而成為國際新聞。

又或者咁,
好可能我都會咁而再上新聞/ American funnies home videos/ Tosh.0等等.......

哈哈哈哈哈~~

但o黎左美國之後, 因為鬼仔架愛駒唔知點解咁受雀仔歡迎,
成日都勁多雀放低幾兩落去, 好嘔心~~
而最令我不解o既係, 泊係佢前後左右的車都冇事ga wor!!!

個車尾其實比車頭更嚴重~~

好彩, 北美呢到o既油站隔離好多時都有自助洗車,
只要鼓起勇氣走入呢架雀屎車就開車去啦~~

有晒步驟教你洗車, 好簡單!!

乾淨晒~~走得!!

---------------------------------------------------------------------------------------------------------------
睇完雀屎, 帶你去睇野食.......
上次去加拿大時, 洗完車, 去左食尼泊爾野~~
唔知係d尼泊爾野係咁, 定係我上次中左伏,
堅咸!!! 一邊食一邊狂飲水~~

番鬼佬翠玉瓜~Zucchini 個瓜入面釀好多野入去, 又係好咸!

善用廚餘

同香港一樣, 係呢樹廚餘收集都唔係好普遍,
(但垃圾分類做得好足)
咁有時剩下o既廚餘又點搞好呢??
掉左佢入food waste disposer 或垃圾桶??
No way......鬼仔有個習慣我不得不讚下佢。

初初o黎美國時打開雪櫃都會諗下,
呢盒係咩鬼野o黎ga???

睇真D, 都係D煮餸時用唔著o既下難野, 連雞肋都不如(!)

但原來好有用,
鬼仔會儲夠一排之後呢就搵個大煲,
將呢d蔬菜煮幾個鐘,
等d蔬菜o既精華出o黎之後再隔渣,
咁就可以留起d汁,
呢d就係vegetable broth, 煮野用得。

除左蔬菜, 佢仲有收起d蝦殼同雞骨+雞o既下難野咁 (於冰箱),
又可以煮埋Chicken broth同seafood broth啦,
唔洗浪費同曬錢買雞湯丫嘛,
仲可以環保d, 減少買就唔會製造咁多包裝廢物啦。

加上自己整, 不含防腐劑, 好好呢~~

講起包裝廢物, 我發現呢到好多品牌o既護墊(女性用品呀),
都係出冇獨立包裝, 咁樣幾好, 可以減少包裝廢物,
反正呢到天氣好乾都唔會咁易滋生細菌,
係香港又濕又立痴痴就唔多okay啦。

我做左蜥蝪人 -- 屠殺家居蜘蛛

放心, 我唔係想講蜘蛛俠睇後感, 哈哈!
(但前兩日去左睇TED, 都冇咩好分享住)

係美國習慣左每個星期一及二大清潔屋企o既我,
琴日完成了我係美國最後一次的家居清潔,
有樣野我由第一日o黎美國已經好想講ga啦,
但成日掛住講無謂野冇寫到,
所以我真係要好好記低!!

係香港家住高層, 又有用藥,
極少有蚊蟲入屋,
最多都係落雨時有d飛蟻入屋o既o者,
一發現佢地入侵緊係第一時間做底佢地啦!!
(呢個工作係我爸爸負責, 如果唔係我就會放一盤水係有燈o既地方下, d飛蟻就會自投罹網ga啦!)
除左四腳蛇之外, 真係唔知點解好鬼死驚呢d小昆蟲ga,
加上, 喂! 香港地地方細細, 買層樓又咁貴,
點可以被呢d昆蟲分薄晒ga, 係咪咁話先? <-- 什麼歪理??

**我香港家中有一大一小兩條四腳蛇, 但其中一條我有次唔小心閂門時一野將佢夾死左, 阿門**

但係美國, 我去親咁多人o既屋企,
都發現d老外屋企有不知蜘蛛網同蜘蛛。 <--好廢, 冇蜘蛛點會有蜘蛛網??
初來報到時真係勁驚同唔習慣,
仲會怪鬼仔點解唔"do something"???
一開頭我都會成日用個吸塵機清晒佢地d蜘蛛網,
見到d蜘蛛都會叫鬼仔快d郁手(!) 但佢通常唔show我。嗚........

其實唔止老美,
我記得以前有個英國朋友都係咁話: 「蜘蛛係益蟲」。
因為美國地方大, 如非住高樓大廈,
佢地o既屋企都由於草地多而好多蚊蟲入屋,
所以呢d蜘蛛網真係好幫得手o既!!
但我真係覺得佢地毛茸茸+長長o既腳好鬼核突!!

(就係呢一隻蜘蛛)

最恐怖一次係有日我沖完涼時拎起條毛巾,
竟然見到中間有隻中型蜘蛛係到, 嘩~~嚇到我丫!!
我又有少少潔癖唔敢掉左條毛巾落地,
鬼仔又唔係屋企, 好彩我夠鎮定, 掛返條毛巾後,
搵另一條抺身, 見到個隻野吊住條絲落o黎,
於是我一野搵鬼仔隻拖鞋打瓜佢, 條屍等鬼仔執。 <-- 很自私的女友, 哈哈~~
(因為我隻家居拖鞋唔係硬底ga, 驚佢唔死)
自此之後, 我依家侍次拎起毛巾都要前前後後仔細check清楚先敢用。

雖然個個星期都清d蜘蛛網同每日都殺左 3-5隻o既蜘蛛,
不過都係徒勞無功,  所以我都係放棄罷啦!!
反正佢地真係有用過我之前買o既滅蚊功具,
加上佢地都好醒目, 冇係d我地成日會接觸o既地方結網,
因此, 依家只要佢地唔失驚無神出現就放過佢地啦!!

********************************************************************************************
題外話, 我生平最驚o既係小強,
但可能呢到暫時一隻都未見過 (touch wood)。
記得舊公司有時都會有d小強出現, 我真係嚇到傻ga,
有一次, 我地公司的茶水姨姨收工時拎住一樽野,
一見到我就收埋, 下意識緊係望係下乜啦, 八掛丫嘛。
點知入面竟然係有小強(!!!)
嘩~~嚇死人咩!!?
佢話佢信佛, 食齋, 不殺生, 所以拎佢去放生喎!!

OMG!! 呢次係我最震撼o既一次,
其實我真係好想同佢講「不如你早d解決佢, 等佢早日輪迴啦」。

撞鬼, 依家諗返我都毛管棟同身痕........ 好驚好驚~~

東西居住大不同

呢樹有個節目我同鬼仔都幾鐘意睇 -- House Hunter International,
(有非International版本的)
內容講乜呢?
通常係每集都講一個家庭/人要由原居地搬去另一個城市, 東南西北, 大江南北咩地方都有,
一集之內佢地會搵當地o既經紀按照佢地的資金同需求,
帶佢地去睇三間屋, 身為觀眾o既你緊係陪住佢地睇樓啦,
最後佢地要於三間屋之中揀一間咁。
鬼仔話好耐之前有一集係講一對夫婦搬去香港,
一邊睇一邊驚訝香港d樓價貴到癲, 但地方又細, 環境又差,
仲話有間屋個窗係對住另一個窗ga wor!

我心諗: 大驚小怪, 香港地大把人都係住緊發水樓同可以伸手問對面屋借鹽ga啦!!
香港房屋政策同大家有咩問題, 我冇打算係到探討, 有苦自己知。

咁今次講咩呢??

我大城里出城, o黎到亞美利加想記底大家居住文化o既不同。

記得以前香港工作個到有座商業大樓, 好新淨ga,
但因為其中有一面o既單位都係對住墳埸,
所以個一忽好多單位都冇公司租或買。

其實, 唔只商廈, 唔少香港人如果住係墳埸附近都話唔老黎ga,
好似我香港屋企向山, 望到不少山墳, 以前有親友o黎過,
都話咁樣係唔好ga wor!!
但我地一家住左咁多年都不錯丫 (touch wood)!!
莫講話墳場啦, 淨係睇我地搞建骨灰龕都被人反對到媽媽聲就知啦!!
(叫個d反對o既人一係咪就咪Q死呀, 一係就要死死遠d, 唔係死左冇地方俾佢ga!)

相反, 係外國, 不時都會見到墳場附近有民居,
就連我上次去鬼仔家姐屋企, 佢家姐住個屋苑都有成排係對正墳場ga。
我同鬼仔講, 俾著香港一定會好少人買, 一係就要超平;
相反, 老外一係就唔信有鬼 (me too), 信o既就覺得要同靈界共存,
所以, 好多老外都唔介意近墳埸 (當然都有例外啦)。

另一樣野, 我地香港地, 地少人多,
d樓緊係向高空發展,
基於種種原因 (例如避開底下o既鬧市, 圾垃房, 蚊虫等等),
我地寧願住愈高層愈好。
但係外國, 若非住幾廿層的高樓大廈,
不少人都鐘意住底層, 最好就連埋花園,
緊係啦, 人地地方大, d住宅得幾層, 冇lift都唔會要行餐死, 一係就遠離鬧市......
如果係香港, 住得高而且冇lift, 你都咪話唔死。

最後一樣, 香港好多人好介意o既「西斜」,
不少老外不知幾鐘意, 因為佢地夏天比較短,
日照時間少, 所以間屋多陽光入屋, 佢地會好鐘意!!
鬼仔爸爸個女朋友就係咁啦, 夏天一到成日出露台曬太陽曬個夠,
唔甩皮都唔收手。

(呢樣又同唔少香港見光死o既女仔相反, 第日再講)

不過, 有樣野老外同我地都好鐘意o既就係 -- 背山面海,
所以就算住唔到咁o既絕境,
一到長假期佢地都好鐘意去有海的地方,
而短假期都好多人鐘意去行山。
同我地一樣!!!

**張相間屋其實唔多關事, 但冇相又好似好吉咁, 就出賣左人地間屋啦~~
-------------------------------------------------------------------------------------------------
最近樓上搬來了一對精力旺盛的新租客,
一大清早就傳來兩口子歡愉之樂的聲音(!),
事後他們整天都搬動傢俬,
晚上十一點半時他們仍在呯呯嘭嘭的腳步聲,
要知道木屋是很傳聲的, 我就像生活於馬埸底下。
唔多夠訓........

點樣食奇異果???

呢個唔算係香港人同美國人o既大不同,
只係我同鬼仔o既大不同。

其實想講好耐, 今日再食奇異果時突然想起,
即刻記底......

唔知大家鐘意點樣食奇異果o既呢??
我就由細到大因為媽咪係咁食, 所以就慣左係個奇異果頂到開刀,
之後就用匙羹筆筆下咁食。

(是我的早餐, 已食完)

我有d朋友就鐘意去皮後切片, 一塊塊咁食。

而鬼仔呢, 話說有日我俾左隻奇異果佢, 一人一隻齊齊食啦,
點知我正想問佢點食時, 佢連皮成隻當蘋果咁咬,
當時我真係O晒咀!!

除左我有個來自蘇格蘭o既朋友之外,
鬼仔係我人生第二個識得會連皮食的人。

佢地話奇異果d皮先最有益, 可以清潔埋你腸胃,
同埋有好多纖維喎,
但我仲係接受唔到食埋個層毛茸茸的 -- 毛皮, 係個口到趙!

唔知同佢講菠蘿o既釘有益, 食左會靚仔仲可以瘦身, 佢會唔會食埋呢???