Saturday 30 June 2012

打包的風氣。 呢舊係乜??

以前成以為D外國人唔鐘意打包.
但原來我錯左, 因為o黎左呢樹幾個月,
發現呢到d人都常常會打包。
你知啦, 美國食物的Size唔係人人都食得晒,
唔係點養到佢地咁有份量呢??
呢到好多人都慣左將食唔晒o既食物打包返屋企,
我覺得呢個行為係唔錯, 唔洗浪費食物丫嘛!!

細個出街食飯好多時都會聽到人話打包,
依家就少左好多啦!
緊係啦, 香港d餐廳愈來愈貴不特止, 愈來愈細份,
食得飽已經好似要還神咁, 仲點會有得剩o黎打包丫??

另外, 可能因為強國愈來愈有錢,
加上愛面子的天性,
以前因為工作關係同d內地人一齊食飯,
或者以前跟屋企人回鄉探親,
佢地勁鐘意叫到成檯都係野食,
驚死失禮人咁, 但又食唔晒ga wor(掛住傾計),
剩左又唔會打包,
唉~~我就好唔鐘意咁樣啦!

亦有d人好鐘意未食檯面d野就話要加單,
之後又食唔晒, 我就好唔鐘意。
我最怕就係眼闊肚窄,
寧願一開頭唔叫咁多野食, 唔夠先再叫囉。

呢個同慳唔慳家無關,
就算我有幾十億身家,
我都唔會浪費食物。

紙盒包裝, 唔用發泡膠~
講起包野......平時係屋企我見媽咪都係用保鮮紙包住d食物先放係雪櫃,
但可能老外覺得錫紙可以保存到肉類o既水分同新鮮,
所以成日隔夜或未用得著o既肉類鬼仔都鐘意用錫紙包住放入雪櫃,
而蔬果就用保鮮紙包啦, 所以搞到成日一打開雪櫃見到咁:

其實, 包到一舊二舊咁, 好多時都唔知邊舊打邊舊係乜??
(張相影得個雪櫃好亂, 因為當時我正打算執好個雪櫃)
另外, 有時去專門買肉類o既店舖,
佢地就好鐘意用紙包住(入面仲有張牛油紙o既物體的), very good,
唔洗下下用膠袋:


呵呵~~又要出門去啦, 北上呀今次,
又要屈係車到十幾粒鐘,
仲要冇得睇決賽,
不過算啦, 無左德國隊已經無晒晒意思啦!!
一星期後見, 祝各位周未愉快!!

Friday 29 June 2012

Summer Eats (我會熱到爆炸, 熱到爆炸, 爆炸~~)

聽聞香港有個百年難得一遇o既颱風殺到喎,
香港o既朋友無事嗎??
放假先o黎打風真掃興丫!!

而芝加哥呢樹o既天氣呢,
陽光普照(!)

咪鬧住......我唔係串咀,
呢到熱過香港,
有成36-38'C,
太陽仲要成8點幾9點先落山,
頂唔住~~真係要開冷氣 (Sorry, 地球先生)。

平時係呢邊雖然有30度或以上,
但因為住係地下個層,都算陰涼,
而且外國天氣冇咁濕, 所以熱起上o黎都唔太辛苦,
加上我住個頭又冇咩高樓大廈,
冇Urban heat island效應,
唔洗日日都開住冷氣, 幾好ga!!

但呢兩日真係坐係屋企睇波都出晒汗,
可能係因為加上德國輸波,
嗚嗚......巴神上半場已入兩粒,
佢係咪未食藥呀???? 咁狠勁?? @*&*#&&##!!!
加埋佢個髮型, 真係樣衰核爆!
(但唔知點解鬧完佢後我個咀損左, 仲嬲!!)
嬲到, 平日最怕昆蟲o既我琴日毫不猶豫咁一掌打瓜左隻阻住我睇波的飛蛾, 哼!!

之後德國雖然起勢攻都係過唔到Buffon個關,
點解德國成日都係要做老三???
德軍力挽狂攔, 但都90+2先入返一粒, 可惜已經太遲~~
唉...... 我真係喊左出o黎咁滯!!
我依家諗起仲係好嬲+傷心呀!!!!! 真係想喊.......
**電視上o既Ballack都冇晒癮, 係咪愛國心切?**

天口又熱到我心裡面都"媽聲四起",
要食返d野令我降降溫。

登登登登~~~~

夏天真係少不了食雪糕~~

估唔到平時咁注重健康o既鬼仔,
一行埋去就揀呢隻喎。

睇波食左咁多熱氣野,
飛茲都生埋出o黎,
淨係靠飲「鬼佬涼茶」-- 啤酒, 都唔係辦法,
好彩我醒起早兩個月係Chinatown買到菊花一包,
可以煲下o黎飲, 我仲加左d杞子,
o岩晒我成日睇波同埋成日用電腦的鬼仔,
雪凍佢, 間唔中飲下!

個樽本來係橙汁o黎o既, 我recycle 用, 慳返!

仲有呢個, 係鬼仔依家專登整o黎減肥用,
係由一堆blueberries, raspberries, yogurt, soy milk 仲有d唔知咩蔬菜放係mixer打成的,
最近早餐都係飲佢, 都幾好, 幫助排便, 而且好飽肚,
我本身排便冇咩問題, 早晚有一次,
但呢個初初飲個時有肚痾o既感覺(!!)
做左幾日痾清暉, 好彩依家冇事。
唔知係咪痾左幾日, 個人都輕埋, 哈哈! 發達啦~~
其實減唔減到肥都唔係問題啦, blueberries對眼晴同腦好, 飲下都無妨。
20120626_090605
我打死也不會說是「汁」, 因為倒出o黎o既質感似足去整再造紙個d水漿(!)
好彩入口都幾好味~~

鬼仔放工返o黎見我喊咁口,
於是帶我去食我地都大愛o既印度野,
見到入面都幾多印度人捧場,
幾好食, 食到勁飽......
散步返屋企, 心情好返d啦!

前菜小食~~

咖哩羊及咖哩雞

但個咀損左, 食辣野之後有d痕痕地...真係P了個大K啦~~

唉...... 我仲係接受唔到決賽係西班牙vs意大利,
我都唔敢期望西班牙會幫我報仇,
到時一定又悶到喊, 又加時又十二碼啦,
好彩, 我睇唔到!! 哼~~

Thursday 28 June 2012

洗。衣。

琴日個埸波, 除左上半o場既上埸段之外, 真係悶到喊(王子又冇落埸),
我仲以為兩牙相爭會多野睇,
頂丫! 點知加時都一粒冇入過, 枉我連廁所都唔敢去。
不過見到C7成埸都係射到飛機咁高我都好心涼,
佢踢到個頭髮都亂晒, 仲成日係到chok,
特別係佢每次罰球前個下動作.......
我諗如果佢射罰球個時西班牙俾塊鏡佢一照,
佢可能波都唔踢, 拉大隊投降返入locker room gel頭都似!!
悶左成埸, 搞到要射十二碼, 好彩c朗未射, 西班牙就出線o者, 呵呵~~~
聽聞之前幾埸西班牙都搞到好多人輸錢, 唔知今次有冇人執返呢?

睇完波, 正想去洗衫, 因為只有星期三, 六係我地o既洗衣日,
星期一, 二, 五, 日都係其他兩個住客的,
而星期四就係阿公o既, 大家都可以用。

除左諗Lunch食乜之外,
我係美國最憎就係去洗衫,
由於要去洗衫就要經過通後園個條樓梯,
而樓梯因為對住後園, 係勁多蚊蟲(!!)
仲有好多蜘蛛網。 
每次行親去都好Q驚ga!!

積左幾日自然多野洗ga啦, 除左衫,
仲有d毛巾呀, 床單呀, 餐巾呀, 枕頭袋等等,
每次洗可能唔只一轉, 唉~~ 一言難盡。
咁多野洗已經好燥, 琴日仲要一行出去見到洗衣同乾衣機都有人用緊,
明明係星期三, o者係另外有租客唔守規則啦!!
竟然用左我地o既洗衫日。 哼哼哼哼~~~

呢個laundry room 好污糟ga, 我執過地下d垃圾幾次,
但好快又有人亂掉, 有時係襪, 但連底底都見過(!!)

老外唔鐘意晾衫, 我地住最底個層, 就算有前園又有後園都唔會晾曬ga,
不過好彩有乾衣機呢個樣野!!
**有時有少少野想晾乾都要放係人地睇唔到o既地方晾 --> 浴室 **

就係咁, 洗衣+乾衣, 我至少要來回個條嚇死人o既樓梯兩次。 
(講真, o黎左兩個月都未克服到, 每次都心驚膽跳。 唉~由細到大d昆蟲都係爸爸搞掂ga嘛! <-- 港童上身。 鬼仔返工時我又要一個人面對!)

呢個洗衣機同乾衣都係要 USD 1.00 一次o既 (業主真識搵錢),
呢樹好多洗衣機或洗車等o既地方都會要用到 Quarters (即 USD 0.25),

即係4個quarters銀仔為 USD 1.00 (好廢的解釋),
就會去Store買呢d銀仔用, 全部係Quarters來的。



本來懶, 都係放係Laundry room, 要用就拎,
但我上個月開始, 已經差唔多係我負責所有洗衫,
我就覺得d銀仔用得好快,
明明個筒銀仔我新開, 點解咁快冇晒咁滯??? 
當時以為自己大頭蝦, 用左唔記得啦!
如是者過了幾次, 我再放一筒全新o既銀仔啦(冇用過),
點知下個星期再洗衫時, 我又發現得返幾個,
即係冇左一半有多(!!)
仲撕開個d紙就咁掉落地下, 哼哼~~
第一次我當你一時冇晒銀仔順手拎去用,
一而再, 再而三都係咁, 再咁落去咪好蝕???
所以, 我地決定以後每次要用幾個就拎幾個出去啦。

呀! 有樣野我呢個大鄉里覺得好得意,
呢個係香港好日都唔做家務 (更冇試過買家庭用品)o既人未見過呢一種片狀的。
呢樹好興用呢種 Fiber softener sheets!!
都幾好, 因為唔似液體狀個種咁大枝野阻住晒又重,
盒狀, 一塊塊~~每次用一塊就夠喇!! 


*********************************************************************************************************
又發UP風, 今日係面書見到呢一張剪報,
其實有少少野我都幾認同筆者......
我朋友都去左個畢卡索展, 佢話唔算多人,
同埋今次D保安好嚴, 所以冇人影相, 但D人好嘈
令我諗起上次去睇PIXAR的慘痛經歷!!

好啦,  又要準備睇波啦, 我懶到連lunch都琴日整定, 死未??
今日 -- Germany vs Italy, 大家有咩心水呢??
而我朋友就話今日係拜仁VS祖雲達施~~ 哈哈! 真抵死~
雖然德國真係好強勁, 但都唔可以掉以輕心,
話晒意大利入得4強都有D料子, 最近都叫谷底反彈,
仲有Buffon出名鋼門, 唔係咁易入 (PK! 咁咪可以能又要玩到十二碼??)。