減壓。。。。。。

蹤左十幾日,
今次唔關個電腦事,
而且最近其中一個妹返左香港,
俾返個Netbook我,
我本來係可以打到blog的。

我唔係被外星人捉左,
而係去左更恐怖的地方 -- 公司!!!!

工作好繁忙, 因為我個上司開始放產假,
無左上司頂一頂, 咩都要直接同個麻煩外藉經理做野,
真係覺得好煩,
還好我同事話佢依家比以前正常左,
所以佢都無虐待我(!!!)

經過兩個幾星期疲勞的工作之後,
呢幾日終於可以正式放假啦,
呵呵呵~~

我好少話買野來減壓,
因為我通常係寫底要買咩然後以麻甩佬買物方式,
即係好似搶包山咁, 一入去就即搵即買需要的野, 買完即閃。
雖則係咁, 最近都買左唔少野,
例如上網買左我人生第一對Ballet shoes~~
是咪好女仔呢??

 

我以前唔著ga, 因為個腳形著得唔好睇,
但今年想有個新嘗試, 又難到一對咁合眼緣,
上網無得試但我對呢個牌子有信心,
因為前後已經買左三對, 知道咩碼係fit size. 哈哈!!

 

真正的減壓係同朋友仲有屋企人gathering....
上星期, 同英國朋友仲有日本朋友去食雞煲+飲野,

 

打邊爐佢地就食過, 雞煲第一次咁話喎,
仲話好正tim, 連d麻辣湯底都飲埋~~~真係捧場!

 

 

仲有上上星期, 又去左玩BB,
我個妹係上年B女滿月酒時已出發去澳洲,
今次再見到佢已經係一歲的小人兒。
我妹唔係鐘意小朋友個類型,
要乖佢先鐘意,
好彩~小B女係好乖乖!!
食飯食得好快, 又唔易喊~~
今次我又買左兩個花花髮夾俾佢啦!!!

不過佢依家開始學行, 就唔鐘意坐BB食飯檯仔被關住,
一放入去佢就知到無自由,
你睇, 佢有晒眼淚!!!
無見幾個星期就識行啦, 不過仍然係打破唔到我九個月就識行識講野的紀錄,
嘩哈哈哈哈哈!!!

祝大家復活節快樂!!

布魯塞爾的日與夜

繼懶人版之Amsterdam 的日與夜後,
又到左比利時--布魯塞爾的日與夜。

晨早第一影 @ 酒店

其實我都知去旅行唔好用一個地方同另一個地方比.
不過, 去完繽紛的荷蘭後, 我真係覺得布魯塞爾無咩生氣。




建築物宏偉就宏偉啦, 又古典又靚,
不過成街的建築物望落去都係呢一個tone的色,
d人著衫又係咁的顏色, 好悶好死氣沉沉囉!


可能我鐘意人笑,
比利時的人俾我印象好cool,
唔似得荷蘭咁成日咁多野講同埋笑面迎人。

加上, 比利時以法文為主,
佢地d英文都唔係好得,
而荷蘭人的英文普遍都係好好,
溝通易d, 就方便得多啦!!

所以返到去Amsterdam我又好開心,
不枉我選擇留三份二的行程係荷蘭丫!!

不過講起法文呢家野都有笑話,
因為我有學過法文 (BB班程度)。

比利時有d餐廳係冇英文餐牌,
鬼仔就會叫我幫佢手睇下有咩食,
D人見到鬼仔同我,
侍應就以為鬼仔先係識法文o個個,
一輪咀同佢講法文,
而鬼仔立即成為龔啞人士,
再用眼神叫我幫手!! 哈哈哈哈~~
到我開口個時佢地就會好驚訝!

比利時都唔係一無可取,
我地去左幾個靚教堂,
仲食左著名的窩夫(!!)


就係食佢, 因為係企街邊食,
我一隻手係寒風中拎住一邊食,
個隻手後來爆左擦, 頂!!

當然有著名的朱古力啦,
我冇咩買返o黎,
因為係個邊日日都有食朱古力, 食到怕左!!

仲有, 我地食左青口...好味好味!!

講起比利時, 有朋友叫我買呢個G字頭的朱古力,
雖然香港都有得賣, 但我都買左幾盒俾同事同屋企人,
仲要係佢地1926年開個間買ga!
呢個盒有返D當地特色啦掛......

仲有呢隻金色包裝,
我唔知點解d日本同內地旅客一去到狂買,
我自己買得一, 兩盒, 比起佢地我好寒酸,
因為佢地係行埋去個架一野捧十盒十盒咁買ga!! 痴線~~~

一齊去食芝士啦

o黎到荷蘭去左一個cheese tasting room,
係一個帶俾我驚喜的地方,
因為我本來只係網上睇到冇諗住一定要去o既,
都係諗住去到就算, 去唔到就罷。

點知, 呢個cheese tasting room令我同鬼仔都好滿足,
而且我地對佢o既評價都好唔錯,
鐘意食芝士o既話, 絕對係值得一去。

最好網上預網, 如果唔係可以walk in,
但唔係個個都好似我地咁好彩,
可以剛好join到就快開始而又仲有兩個位的class,
冇錯, 佢係好似一個課堂咁ga,
承惠EUR 15.00一位。

今次呢一堂剛好係英文o既,
講解人係呢個芝士品牌創辦人的孫仔~~
佢好可愛ga, 仲有親切o既笑容,
講解又有趣同埋詳細!

Well, 如果佢再靚仔D, 張相應該會係佢攬住我而我攬住舊芝士(!!)
又或者我飛禽大咬, 我攬住佢, 死未???
(咁新聞國際版將會係「呷醋美漢荷蘭怒殺港餓女」)
痴左........................................

講返呢個cheese tasting class,
每個人的檯面都會有幾舊佢地自家品牌的芝士,
一個切芝士器, 仲有幾個酒杯。

最估佢唔到o既係 -- 一張咁o既紙, 同一枝筆,
原來佢會一邊講解, 講下佢地呢個芝士品牌o既歷史,
佢地自家出品每一種芝士的特質,
仲有配咩酒食最好,
你一邊食一邊飲,
一邊要抄錄下來。

大家都好專心同食得好滋味~~

最後, 個講師仲會check下大家的筆記如何,
如果寫得好會有佢簽發的證書。

呢一份係我o既, 呵呵~~

鬼仔個份?? 佢條友掛住飲飲食食, 淨係寫左兩行,
所以冇講師簽名!!!
佢個衰仔仲話打算照抄我個份就算, 真曳!!

上完堂, 可以有折買芝士, 大家都好鐘意,
連鬼仔都有買呀, 不過美國唔可以帶食物入境,
所以鬼仔返屋企時海關問左佢好耐先得咋, 嚇死佢!!

一扇門通向世界

有睇開我BLOG的Blog友們都應該記得我鐘意儲postcard,
所以朋友們近年每次去旅行都會寄俾我,
我兩個妹去左澳洲之後每去一個地方都會寄返o黎屋企,
而我都會係旅行時寄俾朋友同自己(!!)
就係咁, 去完呢個荷蘭+比利時之旅後, 我屋企度門終於貼滿晒名信片啦,
仲有三張多左出o黎~~
依家諗住由房門開始又再貼(!!!) <-- 媽咪可能會想殺左我!
鬼仔成日話我真係好奇怪, 自己寫俾自己喎,
但佢話亦都鐘意我咁奇怪!! 嘻嘻!!

 

呢張係上星期收到個妹寄返o黎的~~

 

呢三張係我自己寄返屋企的....

係Amsterdam又搵唔到郵局, 酒店又話無晒郵票,
於是教我地去買, 原來係有得賣報紙雜誌的地方都會有得賣,

嘩~~買完之後我又唔捨得寄呢, 張張都好靚呀!!!!

 

呢張係我寄俾澳洲的朋友, 佢都於上星期收到~~