一齊去食芝士啦

o黎到荷蘭去左一個cheese tasting room,
係一個帶俾我驚喜的地方,
因為我本來只係網上睇到冇諗住一定要去o既,
都係諗住去到就算, 去唔到就罷。

點知, 呢個cheese tasting room令我同鬼仔都好滿足,
而且我地對佢o既評價都好唔錯,
鐘意食芝士o既話, 絕對係值得一去。

最好網上預網, 如果唔係可以walk in,
但唔係個個都好似我地咁好彩,
可以剛好join到就快開始而又仲有兩個位的class,
冇錯, 佢係好似一個課堂咁ga,
承惠EUR 15.00一位。

今次呢一堂剛好係英文o既,
講解人係呢個芝士品牌創辦人的孫仔~~
佢好可愛ga, 仲有親切o既笑容,
講解又有趣同埋詳細!

Well, 如果佢再靚仔D, 張相應該會係佢攬住我而我攬住舊芝士(!!)
又或者我飛禽大咬, 我攬住佢, 死未???
(咁新聞國際版將會係「呷醋美漢荷蘭怒殺港餓女」)
痴左........................................

講返呢個cheese tasting class,
每個人的檯面都會有幾舊佢地自家品牌的芝士,
一個切芝士器, 仲有幾個酒杯。

最估佢唔到o既係 -- 一張咁o既紙, 同一枝筆,
原來佢會一邊講解, 講下佢地呢個芝士品牌o既歷史,
佢地自家出品每一種芝士的特質,
仲有配咩酒食最好,
你一邊食一邊飲,
一邊要抄錄下來。

大家都好專心同食得好滋味~~

最後, 個講師仲會check下大家的筆記如何,
如果寫得好會有佢簽發的證書。

呢一份係我o既, 呵呵~~

鬼仔個份?? 佢條友掛住飲飲食食, 淨係寫左兩行,
所以冇講師簽名!!!
佢個衰仔仲話打算照抄我個份就算, 真曳!!

上完堂, 可以有折買芝士, 大家都好鐘意,
連鬼仔都有買呀, 不過美國唔可以帶食物入境,
所以鬼仔返屋企時海關問左佢好耐先得咋, 嚇死佢!!

Amsterdam 的日與夜

平時旅行後都會逐過地方介紹,
但今次唔知係咪因為蛇年,
蛇王上身,
好鬼懶!

而且可能因為覺得Amsterdam靚,
一路行行下都影左不少相,
有d又唔係d咩名勝,
介紹o黎都把鬼啦,
但又想有個回憶喎,
於是將一堆相放出o黎算啦!

我去旅行係咁ga啦,
成日都鐘意漫無目的行,
又或者坐定定係到飲下咖啡/啤酒望下D人,
每日去一兩個地方已經夠。

次次見到d亞洲遊客佢地都係一袋二袋去去shopping,
又或者見到好多強國人去到一D名勝,
熙熙攘攘咁掛住影相 (佢地D post勁搞笑)之後又好快咁拉大隊走人,
唔知趕去買野定下一個景點。
又或者見到D朋友覺得去旅行一定由早到晚都要出去睇呢樣個樣,
最好一日去10個景點咁就回本啦,
我好鬼怕!!

對我o黎講係去旅行=休息,
因為終於唔洗屈係香港,
係香港, 生活緊張,
趕呢樣趕個樣,
我唔鐘意去到外國又係咁趕頭趕命四圍趕, 走馬看花,
我想有時間可以思考一下, 又或者欣賞一下當地的景色, 人事。
 (懶寫意咁囉)

酒店的附近~~Good morning Amsterdam!!

食早餐, 寧靜的早晨

步行去景點中。。。

沿河邊閒逛

係Anne Frank House出面排隊中...

前往紅燈區。。。

終於去左紅燈區但個到係唔俾影相的, 所以咁啦......

但完全破壞晒我心目中對紅燈區的幻想,
 並非我想像中係窗前騷手弄姿,
而係木口木面玩電話(可能搞電召)同呆企。
最令我不解係. 企係窗前的囡囡都是那麼的醜, 超重口味!!!
有D瘦到排骨咁, 波平如鏡; 有D又肥到有身孕咁,
有D個樣好鬼嚇人, 仲有D妝又係化到好恐怖!!

我自己解釋係 -- 客人太餓, 飢不擇食,
一係就食得好野多, 所以要食返重口味野平衡一下,
最後可能係咩都試下啦, 黑媽媽唔覺o既。

有笑有愛之性愛博物館 - SEX MUSEUM IN ASMETRDAM

警告: 本篇有不雅照片, 如未滿18歲請勿瀏覽。


今個農曆假去左荷蘭,
除左想睇Vincent Van Gogh之外,
我最想睇就係呢個Sex Museum,
因為我上網見到覺得好似幾有趣咁,
反正今次去荷蘭無得去風車村睇風車,
唯有睇「大枝野」去補數(!!)

一入門口就有呢個手淫情侶歡迎你~

要入去就要科水, 承惠 EUR 4.00一位, 幾抵!!!
雖然, 個博物館細細, 但我覺得佢幾好行,
而且都幾得意同搞笑, 唔失望,
雖然呢個博物館係以性愛為題, 但唔好以為講淫穢野o既。

佢有講下性的歷史, 介紹下d動作, 性行業, 性工作同性電影等等,
仲有睇完令人覺得好痛的貞操帶(!!) 唔只女人有ga喎, 男士都有,
當然, 依家講呢d野會令大家訓著或情緒不安。
所以我緊係擺d有趣 (我覺得) o既相俾大家一齊share開心啦!! 哈哈哈~~
費事被人投訴, 故我大部份照片都被性器官打濛左!! 

 仲有佢, SM王子~~

露南北半球索女~~

性感女性的象徵

四葉呢個表情好正~~
大佬我真係唔知點樣可以為呢D相打左格仔佢而你又睇得明囉,
唯有出警告照擺~~反正又係假O既, 你睇得明係咩就係咩啦!!

呢兩枝野高過個人, 係震館之寶!!!

仲有呢個機都幾搞鬼~~
佢會吹漲D dom dom~

sorry, 影得衰, 不舉咁tim......

呢d箱上面有個洞俾你伸個頭去望入面o既相....

仲有好其他野睇ga, 但我費事咩都影一餐,
有機會去行下啦~~

PS: 其實隻四葉妹妹公仔唔係我的, 係我個細妹o既,
咁大個人, 我帶住佢去街都覺得幾醜,
但個妹一知道我要去旅行就托人係澳洲帶返o黎香港俾我,
逼我一定要帶佢去影相(!!) 俾佢,
呢隻公仔大大話話都遊覽過亞,歐, 澳ga!

最後, 祝大家新一年身壯力健, 出入平安!!

新年去左行大運!!

遲來的新年快樂!!!
祝大家蛇年龍馬精神, 心想事成!!
男仔日日都咁有型, 女仔青春常駐~~

閃走左一排, 因為呢個農曆新年有10日假期,
冇計, 老闆迷信揀吉日開工, 故聽日先上班,
今日一早落機返香港。

今年屋企好冇過年氣氛,
因為我去左旅行, 爸爸返佢鄉下, 兩個妹仲係澳洲,
得返我媽咪一個係屋企,
佢話咁仲好, 個地下唔洗咁多頭髮, 吸塵都快d~~

閃左去邊呢??
就係同五個幾月冇見的鬼仔一齊去荷蘭+比利時~~
呢次真係有驚無險, 因為出發前美國大風雪, 勁驚鬼仔o黎唔切,
好彩最後只係班機delay左少少, 我係Amsterdam機場呆等(!!)
之後到我, 一出火車站就差d俾人偷左個銀包,
還好我警覺性高, 係火車上已經feel到唔多對路,
之後又feel到有人逗我個袋(我搬緊行李),
再來仲猖狂到係鬼仔幫我拎行李落樓梯時兩個小偷一前一後隔開我地再伸手開我個袋,
頂你個肺一真係當我流ga??? 於時一野捉住佢隻手擺出一副我剛剛係少林寺十八銅人陣出o黎咁款,
佢地先走人!!
哼~~ 而鬼仔竟然係完全唔發現o既.....
如果我被人捉走佢可能要去到酒店check-in先發現我唔見左!

好彩, 之後都冇事發生,
成個行程都好開心。
又, 非常老土地本人之前去過的地方都只係見到殘雪,
今次終於俾我見到落雪啦!!
好彩呢幾日都冇想像中咁凍,
未死住~~

更開心地呢個係我同鬼仔第一次一齊過的情人節,
所以今次佢唔洗寄花/禮物, 可以親手俾我, hehe~~~
(我都有買朱古力俾佢)

總括o黎講我鐘意荷蘭多過比利時,
除左因為d人英文好d之外 (雖然係比利時我都有講下我的BB班法文),
我覺得荷蘭d建築物, d人的面口, 衣著同性格比比利時更有活力~~
旅遊POST遲D先出啦, 哈哈!!

最後, 再同大家講多次蛇年快樂!!!!