七月頭

七一, 我竟然去了遊行,
其實我同友人都係第一次去,
以前我都無諗過自己會對政治咁有反應,
第一次係反雙非(當年我表哥個女準備出世, 眼見港人身受其苦),
第二次係反國教,
再加埋上上星期五阿"那星"單野後,
咁夾硬都有, 同強姦有咩分別??
實在太令人氣憤!!

好多人睇到電視播咩就信咩,
見到d議員同上街人士的行為就話人搞到香港立立亂,
阿婆阿伯係鬧長毛同癲狗o既同時,
唔會知道佢地當年就係為佢地爭取加乜乜金物物金。


做傳媒o既朋友話, 依家好多報章雜誌都被大陸人做左高層(包括佢自己做緊個間),
成日被要求改稿, 要維穩,
民主同高論自由一日一日偷偷被打擊!

學似我d姨媽姑姐話依家人人有工開咪幾好, 搞咁多野做咩乜?
係人都知道咁鬼死熱係屋企涼下冷氣好過啦,
仲出去遊行做咩喎!? 關我咩事喎!?
(遊行當日我地係第一批出發, 但行左差唔多3個鐘,
都仲係未到sogo門口, 因為d警察唔開路, 塞死晒,
好明顯想又熱又落雨逼走d人囉!)

我想話, 香港之所以咁多外商o黎投資,
享有高度自治同自由o既經濟體系就係其中好o大既誘因,
如果連呢樣野都無埋, 搵鬼o黎咩?
咁連競爭力都無埋, 係咪仲人人有工開?
好多人都唔識居安思危。

今日可以拆左人地條村,
第日一樣可以拆你或者我o既屋企;
今日我地無權選出屬於自己o既特首,
第日連選出區議員o既機會都可能無埋;
今日有內地劉曉波政治獄,
第日都可能會係香港發生。
唔係過得一日就一日就算!

**遊行趣事: 頂丫! 我隻腳中左童子尿 (!!) =___=
****************************************************************
最近除左瘋狂買衫褲鞋襪大出血外,
真係愈窮愈見鬼,
連d用開的護膚品, 化妝品, 個人用品通通都一齊見底或用晒(!!)
真係邪門呀!!

仲有, 除左洗錢,
我連續幾個星期六都約了朋友去游早水,
但幾早呀, 個太陽都狠毒過我把口囉,
曬到成個泰妹咁都唔算, I like tan  (只限個身)!!
曬完都要用d lotion ga,
之前用開o既body lotion係好潤,
但依家呢個天氣用就痴立立,
同雞肋一樣, 食之無味又棄之可惜,
幾經辛苦終於用得七七八八。

係屋企搵到呢盒野,
唔知幾時買定人地送,
應該好多人都聽過見過或用過~~
人地話曬傷用蘆薈好,
我試了, 幾好, 唔立痴痴仲好快吸收,
隻味又唔濃。

上星期日, 去了探表哥的初生BB,
係仔來的, 搞錯! 個個都話想玩女,
連表哥都話鐘意女。

小B的手隻係咁細

呢個表哥同我同年 (大十一個月, 佢年頭我年尾),
咁就睇住佢做完老襯, 仲做埋老豆,
真係覺得自己有少少老(!!)
但, 每一次見完人地湊仔,
我更享受目前o既自由。 XD

玩完b 點會係薑醋食, 嘿嘿~~

唔只人仔呀, 貓貓都大得好快,

佢地有牙仔出啦, 仲愈來愈大隻,

愈來愈肥(!!) 我媽咪實在太寵佢地了~~

陪我等波睇到訓...

四強咁就產生了,
哥斯達黎加真係表現唔錯,
難怪被人叫黑馬,
踢到荷蘭橙要踢埋12碼先出到線, 勁!
雖然輸左, 但今屆被呢班天降奇兵打動了。