新年去左行大運!!

遲來的新年快樂!!!
祝大家蛇年龍馬精神, 心想事成!!
男仔日日都咁有型, 女仔青春常駐~~

閃走左一排, 因為呢個農曆新年有10日假期,
冇計, 老闆迷信揀吉日開工, 故聽日先上班,
今日一早落機返香港。

今年屋企好冇過年氣氛,
因為我去左旅行, 爸爸返佢鄉下, 兩個妹仲係澳洲,
得返我媽咪一個係屋企,
佢話咁仲好, 個地下唔洗咁多頭髮, 吸塵都快d~~

閃左去邊呢??
就係同五個幾月冇見的鬼仔一齊去荷蘭+比利時~~
呢次真係有驚無險, 因為出發前美國大風雪, 勁驚鬼仔o黎唔切,
好彩最後只係班機delay左少少, 我係Amsterdam機場呆等(!!)
之後到我, 一出火車站就差d俾人偷左個銀包,
還好我警覺性高, 係火車上已經feel到唔多對路,
之後又feel到有人逗我個袋(我搬緊行李),
再來仲猖狂到係鬼仔幫我拎行李落樓梯時兩個小偷一前一後隔開我地再伸手開我個袋,
頂你個肺一真係當我流ga??? 於時一野捉住佢隻手擺出一副我剛剛係少林寺十八銅人陣出o黎咁款,
佢地先走人!!
哼~~ 而鬼仔竟然係完全唔發現o既.....
如果我被人捉走佢可能要去到酒店check-in先發現我唔見左!

好彩, 之後都冇事發生,
成個行程都好開心。
又, 非常老土地本人之前去過的地方都只係見到殘雪,
今次終於俾我見到落雪啦!!
好彩呢幾日都冇想像中咁凍,
未死住~~

更開心地呢個係我同鬼仔第一次一齊過的情人節,
所以今次佢唔洗寄花/禮物, 可以親手俾我, hehe~~~
(我都有買朱古力俾佢)

總括o黎講我鐘意荷蘭多過比利時,
除左因為d人英文好d之外 (雖然係比利時我都有講下我的BB班法文),
我覺得荷蘭d建築物, d人的面口, 衣著同性格比比利時更有活力~~
旅遊POST遲D先出啦, 哈哈!!

最後, 再同大家講多次蛇年快樂!!!!

發花癲

最近發花癲,
係屋企放D花已經滿足唔到我。

 

 

可能我似我爸爸,
所以鐘意種野,
最近我開始自己種下花(我爸爸鐘意草, 無花開o既)。

我呢D新手, 緊係搵D易打理ga啦! 哈哈哈~~

 

網紋草,
我原本唔知佢原來要咁多水,
所以開始左一個星期佢就dup晒,
好彩上網一搵, 原來佢要好多水o既....
依家搶救完冇事仲標多幾塊葉仔呢~~

 

 

呢個我見佢都幾靚所以就買, 種左成個星期先知佢咩名堂,
原來叫萬壽花...哈哈! 失覺晒~~

當然仲有好多人都會種的 -- 非洲紫羅蘭, 但呢幾日佢D花謝左啦又~~點算?

 

  

我仲學人剪左佢D葉想種多一兩盆,
等左兩個星期有多先有一塊葉生左D根,
見唔見到呀???? 好細條ga~~

 

除左我發花癲, 仲搞到我表哥個女都發花癲,
哈哈!!
琴日同姨媽成家一齊去食飯 (當然又係要做陪酒陪我姨丈飲),
今次冇買玩具, 買左兩對髮夾俾個貪靚妹。

我個新髮夾靚唔靚呀???

撞鬼, 冇見三個星期佢又識行幾步啦, 真係大得好快!

年齡係咪女仔最大的死穴呢???

一日打兩篇, 因為我最近有樣野真係覺得好想知.....

女人係咪好介意自己個年齡???
年齡係咪女仔最大的死穴呢???

是咁的:

早兩個星期公司食Annual Dinner,
有個傳聞係"全公司最細"的女同事坐我隔離...

基本上平時我只會係公司洗手間撞到佢o既o者,
通常佢都係化妝, 傾下計, 或者講下佢扮靚的野等等...
咁我諗都係閒話家常同講下笑o者, 都冇咩野。

點知, 個晚佢不停自拍,
仲不只一次問其他人:「我同佢邊個細d」 (個佢係 = 我本人) (!)
又會冇啦啦chok晒聲爆句「我仲係細路女o黎ga咋, 咩都唔知ga」(!!)
最後返屋企時佢仲話「你走左我就會變返最細ga啦"咁」(!!!)
(但我見佢咁o既行為, 就以為佢仲係好細個啦, 因為佢個樣都好後生)

我本來都以為佢講笑所以問我地邊個細d o者...
但估唔到原來佢真係咁上心ga喎!

因為呢個問題仲發展到今個星期....
有日我係pantry見到有隻好細好細o既曱甴乾屍痴住左係個牆邊的膠紙到....
當時得我同公司個嬸嬸係Pantry~~
於是佢話「嘩! 你真係好眼力呀, 你係第一個發現到」
正所謂薑係愈老愈辣, 阿嬸嬸打蛇隨棍上問「你其實係咪o岩o岩畢業, 廿歲出頭ga咋??」
我話:「都唔係出頭啦, 廿幾啦!」其實我都估到係佢想問我幾歲ga啦....
咁佢又話「我見你著d衫仲好年輕個樣又咁細個, 好似廿歲出頭咁。 有d人囉, 成日以為自己係公司最細,
我今朝就話未必啦, 睇阿妹妹仔好似細過你 (妹妹仔=我本人), 於是有人叫我訪問下你囉」
我就問「咁全公司最細個位幾多歲呢??」
佢講完之後我發現「咁我可能真係最細o個個喎」
我話左俾佢知幾歲啦,
但佢話「真係唔似喎, 望落後生D」(阿嬸嬸真係識tum人)


就係咁 -- 我好驚訝地發現呢個女仔原來大過我,
但仲問埋/講埋d我十六歲後都唔會再講o既野(!!)

第二日, 阿嬸嬸又係pantry同我吹水話「最細個個今日仲堅持自己同你同年喎」
我就話「其實點解要咁介意呢? 企係幼稚園你就最老, 企係老人院你就最細ga啦」
阿嬸嬸話我呢個想法正確!!

我真係唔明點解佢咁大個人都仲咁介意呢個問題,
我真係唔介意唔係全公司最細定最大,
除非你同我講最公司最細個個bonus出多份啦!!我就話我琴日先出世啦!!! 哈哈~~

人總係會大ga啦, 但仲成日提住呢樣野我覺得好唔成熟囉,
你個樣可以好後生, 但思想要成熟d,
成日要問人自己睇落細唔細, 靚唔靚, 莫講話男仔, 普通人都怕鬼左你。

做女仔, 唔係淨係單單要識化妝扮靚,
最緊你待人接物, 談吐,
唔可以仲成個細路咁。
仲有, 唔好成日開口埋口講減肥化妝Shopping,
應該培養返d興趣...煮野食, DIY小手工, 種花, 運動, 音樂, 電影乜都好啦,得閒睇多d書,
所謂「腹中有書氣自華」。
唔好搞到都咁大個人, 仲俾人覺得你好幼稚.......

如果俾我揀, 我唔會想返去十五六歲個時ga,
我覺得我鐘意依家的自己多d (雖然仲係好白痴好幼稚),
女人愈大其實都愈有韻味,
總之年紀大有大的靚, 後生有後生的靚啦,
而最主要係你個人有無內涵。

公私兩忙忙

返工一肚氣, 忙都算啦,
對住D無能上司+一位無理取鬧的註海外同事,
真係好激氣,
可能外國人比較自我啦,
但你都唔可以講完D野唔算數ga嘛!!
還好我有白底黑字record,
你失憶我唔係ga嘛,
最後被我係老細面前KO返佢地! 哼!!!

好, 呻完!

最開心的忙碌就莫過於見下朋友仔!!

飯局飯局飯局~~

仲有就係由於到到都有減價,
今個月買左好多野,
明明月頭話唔買咁多野(!!)
 

呢幾樣只係琴日買的, 上星期同再上星期都仲有買(!!!)

 

由於我好乖, 所以又買左兩大張貼紙俾自己.....

 

當然又係時候見下兩隻小朋友啦~~佢地大個左喎好似!!

 

 

 

呢堆襪係我個妹買的, 仲有一堆衫,
我個妹要我地幫佢寄去澳洲....
最慘係, 佢要我每件都試上身之後影相俾佢,
之後仲要媽咪洗埋同拎去改埋先寄(!!!)
爸爸仲要幫手剪左D線頭,
總之, 全家都要服侍佢公主病病人!!!

 

 

星期六, 同朋友仔去左睇Andy Warhol!!!
好多野睇呀, 而且d人都唔算多, 可以慢慢睇~
以前上design時只係睇過相同聽下tutor講,
親眼見到真係唔同d,
雖然我又唔係十分崇拜佢,
但我覺得佢好識諗橋同有創意。

大家得閒就去TST 藝術館睇下啦, $20 咋。

 

星期六仲一早仆左去POST OFFICE,
真係老土, 以前都係上網買,
今年, 大家都知我屋企個電腦Short short地,
等佢開得機o黎都俾人買晒啦,
唯有死死地氣去排隊,
hi你, 估唔到咁多大陸人同埋d唔知頭唔路o既阿嬸阿婆,
一早排左係到但又唔知做乜勁,
排左好耐, 真係想殺人!!!
以上呢D都係幫表哥同同事順手買的, 呵呵~~不負所託!

掌上明珠

自從上年表哥個囡囡出左世,
我淨係佢未足月同滿月見過佢之後,
就去左美國, 之後又因為返工同探舅父所以一直都冇見過B女啦!!

今個星期, 我特登叫我媽咪約埋姨媽表哥佢地飲茶,
叫表哥記得帶埋B女俾我玩(!!) 哈哈~~
琴日終於有得再見BB啦~~

於是一早流流除左去圖書館同郵局之外,
就係仆去買禮物俾BB,
本來想買衫仔, 但又唔知佢呢家幾大份,
所以就買D玩具啦!!

 

左手邊個舊粉紅色野好明顯係俾佢咬同掉.....
右手邊個舊就係俾佢D大之後玩, 可以認圖形~

BB呢一樣野真係大得好快,
我只係冇見佢十個月之嘛,
估唔到佢由一舊淨係識訓同食奶軟林林的小BABY,
變到依家咁大份,
又識開始自己飲水,
又已經食緊粥仔,
仲有牙仔出,
更加識叫「爸爸」tim <-- 題外話, 人地話bb識叫邊個就邊個辛苦d ga喎, 我都係識叫爸爸先ga, 哈哈。
食完野佢仲識企係人地個大脾到跳跳跳~~
我真係不得不驚訝, 嘩~~BB真係大得好快~~

自己飲水水~~~

小B女係我地家族久違的BB女,
基本上自從我最細個妹出世之後一路都係得表弟, 表弟, 表弟同表弟出世,
我個妹都大個左啦(已成年),
玩來玩去都係BB仔, 呢十幾年來個個都想玩下BB女啦,
而呢一個BB女就係我地一班老表之中第一個BB,
所以後生或老人家都錫晒佢!!! 簡直係我地o既掌上明珠!!!
(情況同當年我出世差不多, 所以我表哥話佢個女似我,呵呵)

 

女仔果然女仔, 一抱佢上手就掛住玩條頸鍊~~

 

不過湊細路真係好大壓力ga,
睇少眼都唔得,
好似我表哥咁, 琴日我表嫂放手交個囡俾佢湊出街, 就出事啦!!
臨出門口跌親, 個額頭起左層樓, 嚇死我表哥!!!

 

雞手鴨腳搽藥膏~~

出到o黎茶樓就問我媽咪同姨媽點算,
勁驚佢老婆鬧~~
好彩買左枝無味無酒精的藥膏俾佢搽下,
之後都散左瘀, 唔係返到去跪玻璃都有之。

見佢對眼仲識跟住手指郁又咁刷得,
仲識跳跳跳~~咁應該冇事啦!!

最搞笑係人著衫佢著衫, 原來幫個女調轉左件衫仔著,
因為我媽咪發現件衫個Label點解會係前面o既??
之後我姨媽又見到對袋係後面,
你話笑死唔笑死??
男人老狗又唔識幫個女夾髮夾,
於是我幫佢夾啦!

B女好貪靚, 佢知道人地幫佢扮靚靚會伸個頭出o黎坐定定俾你夾,
之後你讚佢「嘩~~bb好靚呀!!」 佢就會好開心ga喎, 笑死我呀~~

 

 

不過BB都幾大壓力, 咁細個就要返學,
所以表哥又湊返佢走, 夜晚冇得玩BB~~
-------------------------------------------------------------------------------------
最開心除左係有得玩B女的我, 同埋有禮物收o既B女之外,
就係我姨丈!!!!

因為我地留底同埋佢地食晚飯,
平日冇人陪佢飲啤酒, 又冇人陪佢食牛肉(我姨媽,表姐個D唔食),
變左有人陪佢飲啤酒又食牛肉!! 仲話我口味似佢tim (因為我連煲湯d陳皮都煦食),
開心到佢開左幾枝酒齊齊飲~~
臨走仲叫我上多D去陪佢飲返杯(!!) 哈哈哈!!!

為左玩BB同飲啤酒我緊係會上多D去啦!!