大人駕到

大家好,
我又失蹤左一排,
因為家中有大人駕到!

係邊水???
之唔係就係我兩隻貓大人囉。

本來一直都想搵貓義工領養,
亦有睇過愛護動物協會, 但都係要家訪,
而且比較多成貓, 我地由有幼貓開始養。

新年時我妹聯絡左一個極度麻煩o既貓義工,
養唔成仲一肚氣,
最後呢條友好似連網上o既facebook page都無埋,
唔知搞乜! 好心呢d人就唔好浪費人地同d貓o既時間啦!

之後搵搵下, 緣份就o黎啦,
有日我妹的朋友o既朋友個爸爸做野間工廈有隻貓生左4隻BB,
上網搵人領養, 於是個妹就上去睇,
有一隻好快已被收養, 另一隻都有人想要,
我個妹話上到去, 呢兩隻貓咪都可愛又好痴人,
所以就一對收養啦!

兩隻都係一個月大少少,
係女仔,
雖然唔係咩名種貓又唔係靚,
但佢地真係超可愛!!

佢地叫做Baileys同Vodka,
本來啡色混色一隻我想叫佢做鴛鴦,
但個妹ban左, 所以我話咁叫Baileys啦,
佢話好喎!!
之後佢就諗另一隻叫Vodka啦,
都好喎!我鐘意飲Vodka!
就係咁, 佢兩個用左酒名。

本來我媽咪都唔係好鐘意小動物o既人,
仲話要趕佢地走,
但接左佢地返o黎後,
我媽咪真就成日俾佢地嗲到好冧!

加上一日三餐都係我媽咪餵多,
佢地就當正我媽咪係米飯班主,
不停向佢賣萌, 嘩~~可愛到!

而對我同個妹, 淨係想出o黎玩先嗲人,
一出o黎就掛住打交, 亂跑,
都唔多理我同個妹o既.......嗚......

本來佢地有生蚤, 但好快就幫佢地沖左涼,
杜埋蚤, 琴日仲去左打第一次BB針,
醫生話佢地都好健康, 好乾淨, 淨係耳仔污糟d,
依家乾淨晒啦!!

洗白白同吹風筒都好合作

唔打交時, 佢地係friend到暈,
你抱一隻o既話, 另一隻會喪喵喵喵喵,
喵到你抱埋佢, 摸住佢地
之後一齊訓著。