當鬼仔還是小鬼時

今個星期同鬼仔屋企人一齊慶祝Father's day,
星期四途中去左佢婆婆屋企過夜, 探下佢,
今年75歲啦!! 仲係好精靈, 而且好鬼馬。
佢婆婆真係好可愛好搞笑ga, 遲d再講~~

雖然冇得睇波但同鬼仔屋企人見面最有趣係聽下佢地講鬼仔細個o既事,
趁依家係酒店冇咩做, 等我做下二五仔爆俾大家聽聽啦:

事件一:
鬼仔有一個家姐, 大佢4歲, 生日日子亦差不多,
當鬼仔出世之後, 佢爸爸媽咪帶住鬼仔由醫院返屋企,
佢家姐竟然以為BB鬼仔係佢生日禮物, 極為興奮!! 哈哈~~

事件二:
鬼仔細個原來都好惡搞, 頭六個月除左喊就係尖叫,
搞到佢爸爸媽咪好頭痛, 唔敢帶佢出街嘈住人。

事件三:
鬼仔細個好鐘意爬高高咁玩,
有次佢爬左上櫃頂玩飛機玩具,
唔上唔落, 落唔返o黎, 
佢家姐向爸爸媽咪求救, 竟然大叫: Daddy~~He is going to die~~~~ (!!)

事件四:
鬼仔4歲時佢家姐8歲啦,
可能呢個年紀唔鐘意同細佬玩,
竟然要求鬼仔如果要同家姐玩就要俾錢(!!!)
鬼仔得4歲何來有錢呢??
丫~~~鬼仔竟然係爸爸媽咪放散銀o既樽到攞錢, 
為左同家姐玩真係在所不息。
就係咁, 一日復一日, 鬼仔父母發現d散銀用得快過以前好多,
一查之下發現d銀仔係晒佢家姐個袋到, 嘿嘿~~
於是佢地沒收左鬼仔家姐o既玩具作為懲罰!!
呢個亦係佢最慘o既童年回憶,
除此之外, 佢兩姊弟其實係好乖乖o既小朋友o黎o既。

事件五:
鬼仔家姐兒時夢想係 -- 海豚訓練員,
佢地屋企有泳池, 但何來海豚呢???
於是, 小時候o既鬼仔就要充當海豚(!!)
係佢家姐o既訓練之下, 於水中做出高難度動作,
連水中跳呼啦圈都曉~~~
呢個我聽到之後真係笑爆咀呀!!! 哈哈哈哈~~ 


好啦, 係時候換衫出去食飯~~

北京春嬌又o黎啦!! 繼續各自各精彩!!

上個月提過好友見報的事,
因為佢依家係北京工作,
係個樹飲飲食食實在不少了,
仲可以係生果報介紹tim,
有興趣去北京飲食夜蒲可以搵o黎睇下。

呢個video前日係我面書廣轉, 係介紹北京夜蒲o既,
雖然今次佢只得幾秒, 亦無再用d令我地笑到傻o既名形容佢,
但好明顯, 我地成班友都係覺得朋友見報係好搞笑o既事。
我地之前仲提議佢拍返齣 -- 春嬌愛夜蒲, 北京夜夜蒲等等。
特別係自從報章以「北京春嬌」形容佢!!!
我每次睇返都係笑到喊ga, 救命!!

明明已經有心理準備但唔知點解我仲係覺得好想笑,
嘩哈哈哈哈~~

講講下好想去返轉北京搵條傻婆tim。

******************************************************************************************************
今日鬼仔又take左一日"work from home",
星期五同星期一day off,
因為今個星期慶祝父親節 (我係咪好不孝呢?),
又順便探下佢o既婆婆, 好緊張tim。
今晚又要開夜車啦,
鬼仔係屋企返工,
我又係到睇波啦,
今日又要睇波, 咩都未執tim!! 妖~~
(所以未來幾日都不會打blog了!!)

琴日個兩埸丹麥vs葡萄牙,
頂!!! 我仲期望丹麥可以幫我收拾葡萄牙tim,
不過我覺得佢地都打得唔錯ga,
咁都追返2:3, 只係我真係好討厭葡萄牙,
最憎係c朗, 琴日見到佢單刀都唔入真係笑左。

之後個埸先係我o既重頭戲,
荷蘭vs德國, 我真係好想知班荷蘭橙會唔會醒覺??
上半埸, 成班仍然係好似個人表演賽咁,
真係個個獨食無痴牙!!!
德國個Gomez真係好堅, 入左兩粒,
之後荷蘭開始急啦, 不停進攻, 仲超級狼死。
不得不讚係Neuer, 佢救得好好, 好波!! 反應好快。
Boateng都好好, 奮不顧身救波, 但又o也左張黃牌, 下埸冇得對丹麥,
我本來期望Muller可以幫德國入多一粒, 點知冇仲換埋人,
不過總括o黎市德國仍然發揮得team work好好, 仲搞到荷蘭索晒氣。
**另外, 罕有地 -- Klose後尾都有得落埸喎, 哈!! (可惜都未有作為)
荷蘭下半埸都踢到少少水準出o黎o既, 展現出好強o既決心,
最後成73分鐘俾Van Persie 入左粒!!
2:1, 我覺得德國嬴得太少了~~
依家死亡B組除左荷蘭之外, 隊隊都有3分, 德國6分,
得荷蘭連輸兩埸, o者係 -- 荷蘭可以訂定機票返屋企訓覺啦喂~
(我真係想講Robben好獨食, 佢應該要同隊友做好d team work, 抵佢撞穿頭。
最搞笑係佢成日挑戰佢拜仁隊友 -- Philip Lahm, 可惜成日被人睇清佢路數, 偷波。)

係喎!!呢幾日都唔記得講,
我係美國睇緊個台其中一個評論員呢係德國前隊長 -- Michael Ballack o黎ga!!!
估唔到佢依家係美國講波!!

好!! 又開始去準備睇波啦, 下星期再會。請呀。

Chicago Ribfest

呢幾日日講波係咪煩到你地死呢??
好彩今日個兩場都冇我心水o既, 亦冇咩睇頭,
我可以講返上周五+周日去o既Chicago Ribfest!!
呢個活動係由上星期五星期日, 為期三日,
有呢一帶食Rib o既餐廳參加, 當然仲有其他野食啦,
亦有唔少攤擋賣下手工藝品, 飾物, 小玩意及廣告商擺擋等等,
更有遊戲攤位同現埸樂隊tim。

我同鬼仔就兩個就去左兩日啦,
因為好近我地屋企, 出門口轉個彎就到 (係屋企都聽到佢地唱歌)。

(唔洗入埸費ga, 但門口有人周住你捐錢, 隨心啦~幫幫人嘛)

地方唔係好大, 兩、三條街咁大把,
不過人同狗就超多~~
人多但呢樹有樣好係 -- 你仲可以路路暢通,
(除非係表演台同每個攤位前面啦, 等睇等食丫嘛)
呢到冇強國自由行嘛, 所以冇咁多唔識做阻頭阻勢又一抽二"能" o既PK停係到囉。

幾多人~~

我都有買雪糕bor, 好熱丫!

當然唔少得呢d烤爐~

仲有兒童區tim~

呢間出名呀, 超多人排.....

係呢到食野唔係俾cash係要先去買飛,
USD 1.00 = 1張,
之後你去到邊想食咩就當現金咁洗啦,
呢個方法最好係 -- 唔洗找錢囉, 所以排隊都唔會好耐。

想買啤酒?? 就要向工作人員出示你有效o既ID (我就係Passport)證明你夠21歲,
之後佢地就會綁條咁o既野係你手, 你先可以去有酒賣o既攤位買。

咁樣幾好呀, 好似我地咁, 唔只買一杯ga嘛, 咪唔洗次次買都出示ID card囉。
而且咁鬼多人, 個個都要show ID card先買到酒就會令到排隊時間加長。

話明係食ribs, 我緊係都要幫襯下啦,
當日我地食呢樣 -- Baby back rib (1/2 Slab, 6 bones),

好味呀...有兩份ga, 但鬼仔已經拎住食緊了~

之後搵d小食食下啦,
買左呢個 -- 唔係薯條, 下面係butterfly shrimps o黎ga, 只係被薯條遮住左。
之後個份都冇影相啦, 成手油立立咁(!!)

吃飽飲醉, 仲有幾張飛, 所以星期日睇完波又去行下當食tea,
食左乜? 都係小食, 雪糕同啤酒咁。
圖片唔多, 我唔夠高影, 又要食野又要拎住杯啤酒, 好忙。

睇band show, 氣氛幾好ga~我仲企到好前tim, 幾叻!

行到攰又去酒吧坐坐。

令人咋舌的小朋友

嘩~~今日個兩埸都好有睇頭呀, 但有兩樣野我想講先~~

有時真係唔明依家D小朋友諗乜,
只係差幾年o者 (扮細), 點解佢地o既思維咁唔同o既??

大家細個有冇參加過謝師宴??
呢一日除左俾你著到靚靚咁同一班同學老師食餐飯之外,
更重要o既係 -- 藉呢一餐飯好好答謝多位老師過去幾年對自己o既用心教導啦。
早兩日聽到一個朋友講左單令人O咀o既事,
是咁的:
有一級文憑試o既學生搞謝師宴,
就快到謝師宴個日,
其中一個負責學生打電話返學校搵相熟老師,
話因為發現找數比起預算多出一千蚊,
其他同學唔肯夾錢喎,
所以要求其中四位老師唔好去(!!!)

痴L線的嗎?? 佢地完全唔知謝師宴的意義何在。
一千蚊, 我當你一班只有20個人, 都係每人夾多$50出o黎,
依家你全級搞, 當你有A-D班 (80人) 都只係俾多$12.5 出o黎o者,
咁都唔肯夾??? 佢地個死人腦究竟諗乜???
其中一個搵家長又好或者幾個夾住一千蚊先, 之後收返唔得咩?
幾十蚊都唔肯夾真係唔知佢地咩心態, 唱少次K都係到啦, 死仔!!

我係個老師真係傷心死啦!!
佢地就係我地社會o既未來主人翁啦, 死未??
講起都一額汗呀!!
***************************************************************************************************
另一單, 我頭先係面書睇到o既,
依家個面書可以見到你面書o既朋友剛剛留左咩comment俾人, like左d乜野。
我就見到有個舊同學晌另一個我唔識o既女人的status留左comment,
而個status內容就好吸引, 下面仲有幾十個comments,
我忍唔住睇晒 (八卦到爆), 鬼叫佢自己冇set private 咩!!

個女仔個status係叫佢前夫唔好咁多廢話,
我一望佢個張相, 佢得頂盡19-20歲,
咁快有前夫??
之後再睇, 佢自己係下面o既comment同朋友呻,
佢話十三歲跟左個男人, (跟字係佢用, 我唔會用)
十五歲有左! 個男人阿媽驚受靶就話結婚!
生完個女仔要返自己屋企住(!!) 由個仔出世到而家五歲個男人都無俾錢,
最近離婚錢又話會俾錢.......到而家追個男人俾返錢,
個男人話要幫個仔改跟個女人姓先肯俾錢佢。之後佢發現個男人又話無錢但又有錢買車,
又可以同依家個女朋友去台灣。
仲話返個女仔轉頭, 話佢而家有家庭所以可以唔洗負責, 所以佢好嬲。
個女仔話:「仲慘個個仔係而家個老公咁, 咁多人死唔見佢死」
最後個女人以「真係當我白痴」作結。
睇完, 15歲返生仔, 個仔5歲, o者係依家20歲,
睇完晒佢其他comments, 原來佢最近又同另一個男人結左婚啦! (恭喜喎 )

另一個同佢係面書一齊呻o既女仔, 都一樣咁叻ga。佢都係得廿歲左右, 佢就生啦, 佢老公又無錢, 又唔肯反工。
仲要個大女開始返學, 要交學費, 另一個就黎出世,
最後以「我可以點。。。。」 作結。

睇完晒, 我真係唔知佢地父母點教佢地,
而佢地細個讀書讀左D乜??
個死人腦係咪裝屎ga???
最恐怖係我好大預感佢地D仔女第日都好大機會同佢地一樣個人生搞到一塌糊塗。

十幾歲人仔就學人搞到大肚,
佢地唔知呢個世界上有Condom ga咩??
冇錢就唔好學人生仔, 四百萬一個ga,
加上自己心智都未成熟, 盞害左個小朋友。

第一個女仔仲夠膽死以「真係當我白痴」作結,我就話個男人不知幾咁了解佢啦!!
以前佢蠢到陪佢唔做安全措施, 蠢到冇諗過後果幫佢生仔;
當日生完仔要你自己返屋企住都做得出,
難道今時今日先知個男人咁冇責任感??
依家都仲奢望佢會"負返責任"。
你話唔係白痴係乜丫???

另一個女仔, 又係十幾歲同人生仔結婚,
老實講, 我完全唔相信個男人係以前好勤力好有責任感,
依家先冇啦啦先咁冇責任感囉。
由個男人唔用condom個一刻佢應該已經知道呢個男人幾咁"盡責"啦!
錯完一次仲唔夠, 依家仲死蠢到同佢生多件???
個男人癲佢又陪埋人一齊傻。
「我可以點。。。。。」
我好想學某DJ個句: 叫佢去買一舊蒜頭, 一隻狗 同一把掃把囉~~
唔明?? 讀一次丫 「蒜」「狗」「掃把」。
明冇??? 仲對個男人有咩期望呀? 靠自己啦!
雖然我知道呢D Case係外國更多, 但睇到呢兩個小妹妹o既威水史,
我真係為佢地感到好心痛,
究竟知唔知咩叫潔身自愛??
我希望佢地可以好好照顧自己d仔女, 等佢地係一個有愛o既環境成長,
仲有好好諗下自己o既人生, 究竟想做d乜? 想變成一個點o既人?
**************************************************************************************************
夠鐘準備睇波啦~~bye~

端午節假期

多得屈先人, 賜給小婢此等打工仔有一連3日o既周未,
星期六, 原來要返工去寄野俾美國,
但後來因郵件被中央扣查,
工作改為 --> 安在家中, 我妹焗cookies!!!

呢個周未真係熱到抽筋,在家中焗了幾個鐘頭餅真係人都癲.
抽筋的小人類晚上活動係 --> 打邊爐!!!
同學仔提議o既地方很du, 爐很du, 連侍應也很du.....
但食物竟然是意想不到的讚讚讚讚讚!!
當係晚o既丸只有牛丸, 肥牛竟然也不多,
大家一味只顧吃海鮮喔!! 珊瑚蚌, 墨魚滑就是無敵的爽爽爽爽!!
我要跟9個人搶吃, 很忙, 無暇拍照喔!!!

星期日, 原來打算安在家中等飯局,
變為 --> 趕頭趕命去睇戲 (hangover II, 笑到傻),
再趕去吃生日飯局,
雖然人數冇啦啦地減少了,
但4個傻婆吃飯, 想食乜就食乜,
想講乜就講乜, 正!!!

星期一, 抽筋的小人類又自作自受,
酷熱天氣下行山去, 而最型的是 -- 把整個路程倒轉了行,
嘩嘩嘩~~原本的落樓梯變成上樓梯,
不只是一條樓梯, 而且不停的行樓梯+泥路(!)
同埸加映, 發癲馬騮狂性大發,
嚇到大家花容失色(??)
吃壽司定驚去......攰到傻!!

現階段為 --> 準備做法文功課! 呵~