新春行大運，行到落腳趾尾

大家好，先祝各位羊年快樂，身體健康，心想事成。要咩有咩！

新年大家做左乜？

係我巡blog之前先報告下新年做左乜以致荒廢blog業。

年廿五，上機去了巴黎，再即轉火車到科隆，

當然又係搵德國仔啦。

香港機場新年裝飾，好搞野

其實呢個trip本來係因為好友由十二月至四月係巴黎工作，

十月時見有機票特價所以買了去痴飲痴食，

加上當時德國仔話未知二月係咪會響德國所以我就買了巴黎來回機票（咁就中晒伏）。

多哈機場見到的「藝術品」

BTW, 卡塔爾航空啲位幾好坐，

舒服過國泰，

同埋多哈機場又幾靚喎，雖不及杜拜。

一來到巴黎就去Grau du Nord 等火車。

德國仔細心地為我book了first class,

全程有free wifi 加好味餐飲，

仲有粒情人節macaroon送。

無錯，落機已經係情人節，呵呵～

晚上去了食大餐同飲野慶祝。

但似乎當地人並唔太重視情人節。

因為剛好係佢地嘅 Kolner Karneval!!!

類似 Halloween 嘅年度盛事，

一連好幾日，

街上會見到每個人都打扮得好特別，

我都去玩了一日（後續）。

之後，大年初一同德國仔齊齊去巴黎玩加探朋友，

非常愉快嘅幾日。

仲俾我買到枝好野，好平14歐呀好似，

係朋友力推嘅睫毛增長液，就試下啦。

巴黎各大藥房都有，

去買個時驚見，原來巴黎藥房都同香港嘅一樣淪陷，

大批大陸人狂掃洗頭水，沐浴露及日常用品，

雞同鴨講嘅收銀員同大陸人溝通不來，

面臭臭地收錢。

最後一日，我先陪了德國仔去火車站道別，

再趕去機場，

心諗已經提早了三個鐘應該無事。

註：朋友們都試過因為巴黎火車事故，各種事故上唔到飛機。故我一直唔會於巴黎上機。

點知早到了機場，仍然難逃一劫，

等過海關都用左兩粒鐘，

仲要未過安檢，

我等左一個半鐘後已經心急如焚問職員可否安排一下，條仆街竟然話佢都唔知要等幾耐，呢到個個都咁等！

我真係屌左出聲咁滯，

咁佢做咩要問人： Can I help you???

百幾二百人係到等，得兩個人做野。

最後，我因為跑得太急，係行人用輸送帶仆了個大街，

爆住缸過埋安檢係起飛前唔夠十分鐘先上到機，

前面仲有個跑到成頭汗的女仔。

機組人員起初以為我只係擦傷手，

後來去廁所幫我包紮嘅空姐嚇了一跳，

因為膝頭傷得都幾大，手掌，手掙同腰都擦傷。>_<

我真係好感激卡塔爾機組人員同多哈機場人員，

一知道我有傷，二話不說去轉機時將我用輪椅（!）送了去救護站洗傷口，包紮同打針，

而且係免費，更用機場專用車送我去轉機閘口。

由於另一班機係國泰聯辦，但真係極為失望，

我去到香港機場想再去檢查傷口，

得到嘅回覆係要聯絡返國泰機組人員，fine,機場人員幫我搵到了，

但無一個人嚟，而係由一個地勤職員教我自己去L6睇醫生。

醫生要等一個鐘先有，見醫生HKD350，洗傷口另收費。

我見仲行到就自己返屋企算，

好彩已經止血同洗過傷口，

只係皮外傷不用縫針，

依家每日洗傷口同換紗布就okay了。

首日上班，包住腳返工，

老細埋嚟派利是嚇親，問我乜事搞成咁，

講完佢無奈地話，法國人係咁（包括佢）。

都話左唔係巴黎走架啦。哼！

首日工作天加晚上舊同學團拜收穫，️yeah !!