養母唔易做+2016記事簿

嘩嘩嘩, 乜咁快又11月中既,

即係, 仲有兩個星期就出糧啦,

又仲有六個星期就2016囉!

點解好似剛剛先開始2015就咁快又一年呢??

我到依家仲有時寫野會唔小心寫左2014 (!)

好似年紀愈大就會對時間無咩概念咁!

最近兩個幾月, 忙於做養母,

因為我妹又拎左兩隻貓BB返黎俾我地服侍,

一隻係佢男友的朋友生左一胎俾既, 

另一隻就係被人遺棄我阿妹執左返黎(之前仲有隻, 大左啦), 

但佢要返工, 唔可以定時餵奶就擺左係屋企等我媽咪得閒睇住佢地。

成日咬人打人的大bb, 仲咬損左我個鼻又抓到我成手都花晒

呢個楚楚可憐細BB, 佢成日被大BB追打,

個妹拎佢返黎時仲係超細隻, 要人手餵奶同唔識自己去Poopoo。

佢又細又弱, 其實個時好怕佢養唔大,

好彩個妹係獸醫院做過護士,

識得幫佢人手排便, 唔係我地都搞唔掂,

所以個期我地真係好唔得閒, 餵完奶又要放屎。

好彩依家大個仔, 仲靚仔晒!

佢朋友個隻就夠大打針,

而且佢成日打細BB,
可以拎走左返去佢到湊。

另一隻都搵佢搵到個主人,
但要等佢夠大打針同對眼好返先,

因為醫生發現佢對眼有d發炎, 

要每日滴四次藥水同食兩次藥,

好返先俾人, 所以就快可以休息下。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

就快新一年, 我都物色左2016的新記事簿,

由於依家已經係拎住iphone篤篤篤入Schedule。

例如咁：

所以都唔會好似以前煞有介事咁日日放入手袋,

大佬, 手袋仲要有本書同生果,真係好重架。

就係咁, 今年我對記事簿既要求如下:

1) 大本少少但唔洗咁厚

2) 多空白位, 可以剪剪貼貼 (對, 我鐘意係入面貼戲飛或旅行既野等等)

3) 唔要有太多低B公仔

4) 平 (因為已經唔洗日日帶住)

比起以前日日將本野帶出街, 掀來掀去會易爛,

依家佢只係放係家中記錄日常生活事,

對於封面同內頁都唔需要太高要求。

以前會科成百幾二百蚊水, 買本靚皮製, 仲要入面既紙係挺身的,

之後我又貼野入去就愈來愈厚+重!

其實2014/15年個兩本都已經係唔係硬紙或皮啦, 內頁啲紙用水筆寫仲會透底。

不過因為太細, 就好快塞到勁漲卜卜(!)

不要問我究竟有咩大事要記錄!

因為我只係連「今日Baileys偷食左好多BB貓糧」等無聊既事都寫既人。

對, 記事簿仲可以當日記用。

所以, 希望大本D多返D位貼野!

最後, 買左呢一本!

以前我好堅持地一定由一月一日先開始用,

但, 依家就買左照用,

而又勁無聊地係未完一年個本寫返同樣的事(!!)

**都係一兩句者, 況且又不是日日寫。**

可惜, 我搵唔到一本無太多低B公仔的,

因為太Plain我又覺得唔抵囉,

仲貴過無公仔呀。

點解揀佢呢??

因為我鐘意貓貓,

所以再多公仔都唔會覺得低B!

反正,我最後都係會用好多登機證, 戲飛, CARD, 相等等住佢地,

仲有, 上網買左好多靚貼紙, 令我依家好有動力寫記事簿!!

哈哈哈哈哈~~~