生病了的一天~

出門旅行, 最慘就係水土不服生病,
可憐的鬼仔, 唔知係食錯野定係因為等曬太陽時飲得太多啤酒同椰青,
返到酒店後佢就叫極都唔起身,
仲話個胃好唔舒服, 而且仲標晒冷汗...
我唯有做妹仔幫佢用清水抺身 (OMG, 我呢個港女咁大個都係第一次咁服侍人)
俾藥佢食 (YES, 我每次出門都會帶住一個小型藥箱, 內有胃藥, 傷風感冒藥, 頭痛藥, 敏感藥, 膠布同紗布等等)...
仲出去買三文治返來俾佢食...
又煲定熱水等佢可以有暖水送藥等等...

我覺得佢係食得太多curry所以搞成咁,
唔知係咪因為外國人好少好似我地咁咩都塞入口,
我地久經孔雀石碌, 打針雞, 哮喘豬等訓練,
鬼仔個腸胃似乎冇我咁好.
佢以前都係柬埔寨試過食物中毒......幾日都訓係酒店!!

一條友無無聊聊, 要照顧病左o既鬼仔,
我絕不想留底佢一個係房....我好擔心~
所以成晚都冇出去,
係酒店睇左泰文版o既"新娘愛鬥大"!!!

夜晚, 佢突然嘔!!!
最慘係, 佢嘔唔中個馬桶,
搞到成個廁所都係嘔吐物,
頂!!! 我成世人最怕係小強同埋嘔吐物,
我次次見到人嘔自己都會想嘔(!!!)

好彩鬼仔嘔完之後好返好多,
仲叫我唔好入去廁所等佢清理,
不過, 去水位都塞左沖唔晒...
唯有等工作人員清理啦 (個位人兄應該想殺左我地吧?)

呢份係我o既, 後面個份係鬼鬼o既...

第二朝早, 我地去附近酒吧食早餐,
被我遇到講廣東話o既人...
但佢地竟然用腸仔煙肉餵貓.......我O晒咀!!!

由細到大, 如果生病, 媽咪都話唔好飲刺激性o既野同食生冷野,
但外國人似乎相反,
鬼仔因為個胃唔舒服,
佢堅持要點汽水同埋生果做早餐(!!)
有西瓜同香蕉, 乜香蕉唔係滑腸ga咩?咁食完咪又痾囉?
但後面有個外國男仔一樣係白青口唇白, 一臉病容.
都係點同一樣O既野....OMG!

喵~~~我食左煙肉, 會唔會肚痛ga??

食飽飽, 鬼鬼去左藥房買藥+睇醫生,
其實唔算係睇醫生, 因為個o個係藥房職員,
佢只係聽完鬼鬼o既病情之後叫佢買d咩藥咁...
有一包, 係咁o既............

係倒入水到成枝都會變橙色ga!