移情六出花???

一向都鐘意係屋企放些鮮花,
好似令屋企有D生氣咁,
而且有D野望下。

係香港通常買來買去都係康乃馨同丁香,
我同我媽咪都鐘意康乃馨, 
有時都會買下薑花, 因為好香。
(百合就比較少, 因為我比較怕太香o既花)

係香港我住o既地方的花店選擇亦唔多,
所以買來買去都個幾款。
但呢期係芝加哥hea幾個月,
有時我都想買d花係屋企擺,
呢到有間花店都幾多選擇,
仲有就係supermarket通常都有花賣 (興放係雪櫃)。
病左幾日, 個人暈陀陀, 
成日都係訓訓訓,
都係出動去買下花啦!!

今次我終於買左d新野 -- Alstroemeria flowers,
因為我覺得個日d康乃馨同鬱金香唔夠靚 (有d謝謝地)。
Alstroemeria 究竟係咩呢???
我未見過喎, 
只係見佢幾多顏色同幾靚,
所以就買o黎擺下。
原來佢係秘魯百合!!
中文名又叫 -- 六出花。
WOW~~真有意思, 呢個名好靚!!!

大家知唔知古代o既詩詞成日都會叫雪花為六出花o既呢??
因為雪花o既形狀係有六枝野隊出o黎喔!!
所謂「凡草木花多五出，雪花獨六出。」

但我仍然係咁愛康乃馨ga!!!  

靚麼?? 呢隻色係鬼仔揀ga 我本來想揀白色~~哈哈!

另外, 呢到o既公園種左好多茶花, 前排開得好靚呀~~ (依家開始熱啦, 謝了)
直頭以為自己身處曼陀山莊丫!! <--痴Q左, 以為自己係王語嫣定王夫人??! 

唉~~病左唯有o也下橙, 吸收多d維他命C啦,
平時食橙一定有爸爸媽咪搣好晒o既我 (公主病!!),
依家想食要自己搣,
真係「有媽的孩子像個寶」。

頂!! d橙乾過我塊面~

廢廢小人類求生實錄 -- 對抗乾燥!!

剛o黎到美國o既第一個星期只有3-6度,
我呢d亞熱帶的生物當然適應唔到啦!!
出外時風又大, 在室外食左不少西北風之後,
又回家開暖氣, 令到我的皮膚極之乾旱(!!)
雖然, 現在芝加哥已比較溫暖 (早晚10度, 中午16-21度),
但呢到係中部, 無海而且風真係很大很大,
我仍然是感到極之乾燥,
但除左狂擦lotion同做mask之外, 我已經唔知做咩好啦!!

最恐怖是, 後來乾燥到生了唇瘡(!!!)
不得了啦, 鬼仔立即陪我去左買藥膏,
仲開始學人搞"蜜糖牛奶面膜"。

要搵勁d o既唇膏同藥膏

而人類係絕境真係會激發內在潛能ga,
以前在香港有公主病,
最多自己焗下野煮下意粉,
自己整d簡單西餐。
但基本上想食咩飲咩湯都係媽咪煮,
中湯喎?? 冇諗過點搞。
但原來女人冇湯水飲真係會好易老,
我覺得冇飲2個星期湯真係差好遠.......

猴頭菇螺片湯

紅棗菊花杞子蛋茶~~個蛋爛左少少. (鬼仔都話呢個好味喎竟然)

終於, 拎返上次係China Town買o既野出o黎研究,
仲有就係生理周期個幾日煲下"紅棗菊花杞子蛋茶"飲,
前幾日我仲係冇鮮魚o既情況下俾我煲到個似模似樣o既魚湯tim。
嘩!!! 唔單只我d朋友"liked"左tim喎,
我諗俾我媽咪見到佢一定覺得我好勁呀!!!
睇o黎我就快可以係返香港前擺脫"地獄廚神" o既臭名啦!! woohoo!!!

過份「危機感」

話說上個星期四,
係我玩電腦o既時候冇啦啦一望出窗,
我望到個樣生得好恐怖o既男人 (打頭!! 知佢都唔想) 鬼鬼祟祟係咁款係前門o既通道到望o黎望去,
而且仲要隔左10分鐘又再行過o黎又望過,
我知道外面望入o黎其實唔睇到d乜, 而且當時我有著衫(!!) 但我唔係驚佢睇到我,
亦唔係驚佢爆格 (冇咩俾佢偷)。
唔知點解當時我個腦竟然係諗起「人形蜈蚣」 (雖然我未睇, 但呢套野已經係我o既朋友圈內一套經典o既恐怖片, 亦係我地o既通話密語),
嗚..............................

我唔想好似戲入面個日本遊客咁冇啦啦被人捉左去做蜈蚣!!!仲有House of wax同德州電鋸呢???
(小姐, 你睇得太多恐怖片啦!!!)

當時尚早, 我仲同個香港朋友係MSN傾緊計,
於是立即同佢講有個咁o既男人出現係我門口啦,
佢個應反居然同我一樣(!)
只能說, 我們太喜歡看外國的恐怖片............
還提醒我要立即鎖好門窗及不要外出(!!)
沒辦法啦, 要知道外國有好多呢d變態佬呀!!!

但我說: 我打算下晝出去散步喎, 難得今日好天。(唔要命都要冷街o既衰女)
最後, 我更煞有介事咁話俾我朋友知,
我住個到o既對面街有一間韓國餐廳, 個到有個錄影機係對住我屋企o既門口個條路,
如果我有咩事, 就話俾當地警察知, 翻查今日xx點xx分至xx分o既記錄(!!!)
而我朋友亦好認真地說: 好, 我知道啦! 洗唔洗聽日打俾你睇下你有冇事??

好痴線吧?? 我知。

下午時份, 我見樓上個女人返左屋企 (砰砰嘭嘭咁行所以我知道),
而隔離鄰居都有人係花園搞緊佢地花花草草,
所以我就斗膽出左去附近公園散步。 (死都要出街.........)
最後, 我個日緊係平安無事返左屋企啦,
晚飯時仲特登Whatsapp sent msg俾我朋友報平安tim 。 <-- 依家諗起都覺得好白痴!

個晚我話返呢單咁柒o既事俾鬼仔知,
佢聽完之後當然係狂笑, 話: Honey, you are so funny!!!!
佢話個男人可能係搵緊人 (呢到間間屋差唔多),
又或者係附近睇樓,視察環境。 (係喎, 點解當時冇咁諗??)
可能佢個樣真係太恐怖啦 (再打頭!!)。

我同我朋友講返之後, 我地都狡辯話: 呢D就係「危險感」。 你咁冇危險感, 去到大陸死左都唔知咩事。 (<--指鬼仔)
而鬼仔又答左令我啞口無言o既一句: I have been to China and I am still alive.

朋友見報你會點??? -- 北京春嬌 (笑死我啦)

如果你朋友見報會有d咩感覺呢??
(當然唔係因為d唔好o既野啦)
唔知點解我次次係報紙, 雜誌, 電視見到, 甚至係電台聽到自己識o既人,
我都會忍唔住好想大笑笑笑笑笑!!!!
自從前兩年我有個中學同學成為某樂壇組合之後我就發現我原來會咁(痴線的嗎???)

琴日我個好友都上左生果報o既副刊(<--按這裡)
而且, 我d朋友仲好好心咁買左一份返o黎影相同大家分享一下,
因為.......我地都覺得好搞笑!!!
點解?? 除左因為佢夠膽死以個之前被大家劣評如潮o既髮型見報之外,
就係報紙上對佢o既形容........

竟然係: 北京春嬌 同 靚女Lina (!!)

哈哈哈哈哈~~  真係笑到碌地!!!

我地班友緊係立即係whatsapp group同面書不停提議佢不如開個blog寫呢寫路,
blog名仲十分頂癮, 之後話題愈來愈扯了!!!

當然, 朋友因為自己o既興趣及才能見報,
都是超級替其高興呢!!!
(但, 下次可否先讓我有個心理準備???)
大家如果要去北京玩, 飲飲食食可以參考一下呀,
下星期仍然會有啊!! 多多支持吧!!

另外, 我昨天才得知, 最近有個同校但低我一級o既男生都當了歌手,
雖然是從未交流過的, 但我想自己日後見到仍然會想笑笑笑笑笑~~

究竟我每日忙乜??

除左鬼仔, 佢屋企人, 仲有我d朋友都問我,
「鬼仔返左工個時你係屋企做d乜???」
WELL!! 問得好...

鬼仔每日6點起身, 8點出門口...
第一個星期我有時差, 5點我已經坐左係到睇電視(!!)
但依家呢 -- 我訓到7點半或鬼仔動身走人先起身, 送佢出門口。
之後可能係再訓多一陣 (豬o黎的嗎???),
又或者一邊睇Animal Planet一邊飲咖啡煮早餐,
再去沖涼 (以前係香港係晚上沖,依家慣左西人習慣, 會精神d),
9am-12pm就係我聽香港某電台節目o既時間,
順便上下網睇下野/ 打下blog咁。

中午之後就開始煮Lunch食,
唉~~依家最憎就係諗午餐食乜(!!!)
煮好食飽, 又洗埋碗之後,
就開始做下家務。 (救命!! 我已經變左個師奶)

通常, 星期一, 二就會吸塵, 拖地...
因為鬼仔係最底個一層, 雖然D窗已經有防蚊網,
但成日都好多蚊蟲, 仲有好多蜘蛛網, 個個星期清都係咁。

而星期三, 四, 六就係我地o既laundry day (因為星期一,二, 三,五,日係另外兩層住客o既laundry day),
由於星期六我地都會出去, 就冇洗衫,
留返晒係星期三,四洗,
好多野洗呀, 要洗幾轉, 之後又乾幾轉。
由於地方大, D家務已經玩左幾粒鐘,
如果個日想飲湯or有野想煮就要呢個時候準備。
之後就睇返我預錄左o既電視劇 -- "it's always sunny in Philadelphia", 或者睇下書。
(我不嬲都唔係電視精, 亦極少追劇, 但呢套野我覺得好好笑)
如果天氣好, 就出去散步, 去行下公園睇人放狗, 去下圖書館或買下花返去插啦!!

由於外國好少OT, 所以6點鬼仔已經返到o黎lu....
所以我唔覺得悶, 反而有時覺得好忙(!!)

呢個就係我o既星級軟禁地方啦 :P

靚麼?? 係我最愛o既康乃馨!!

又再打GOLF去 + 尋找小松鼠

係Indianapolis 除左去鬼仔表哥屋企個house party外,
第二日我都陪左鬼仔同佢爸爸去打golf,
反正一條友牛係到冇咩做嘛!!

上次我講過打golf好悶,
可能因為我個次淨係睇佢地玩發球,
加上我資質差, 發幾十幾廿次枝捧先打中個波幾次(!!)

今次時間充足, 我地就唔洗淨係玩發球啦!!
去左最近o既高爾夫球場玩,
入面有晒小河, 沙地等等...
係呢到打golf唔只係有錢佬玩兒,
連小學雞都玩, 有兩個小朋友 (約十歲左右),
仲係有晒成set 裝備ga wor!

我地租左呢架車車, 本來佢地叫我負責開車, 但我太淆底, 都係由佢地開返...

靚嗎?? 環境好正ga~~個日天氣仲好好tim~

傻佬找波去~~

4個打golf的傻佬~

呢個就係園區地圖啦!! 呢一只係打左8個區就鳴金收兵~~

本來時間真係好夠, 但係呢兩個小朋友,
每去一個區都搞好耐先發到球,
鬼仔佢地慢慢等, 等佢地完成左之後先可以開始...
前前後後3區俾佢地拖左成粒鐘(!!)
後面仲有一對父子又等緊喎...
於是鬼仔爸爸提議不如4個人一齊打啦。
到左第4個區, 對小朋友終於覺得好似阻到人,
所以俾鬼仔佢地開始先, 太好了!!

其實我唔識打golf,
咁有咩好做呢????
就係當佢地唔知個波打左去邊之後我幫下眼去搵(!!)
除左呢個任務之外,
仲有就係去餵蚊。
可能呢到d蚊未食過中餐,
我係呢到成日俾佢地嬲住...好驚!!
我當然冇嬲返佢地啦, 因為我了解佢地對中菜o既熱愛,
反正我不嬲都好惹蚊!!

其餘時間我都係自己搵野玩,
因為呢到好多松鼠,
我就四圍行去影下相, 搵下松鼠, 甲蟲咁(!!)
係我個人o既野外考察....=__=
(BTW, 我好驚昆蟲ga, 淨係得蝴蝶, 甲蟲同蜻蜓先冇咁驚)

見到呢d菇, 好cute喔!

仲有一隻哩係筍位遮蔭o既松鼠!!

呢隻一見到我就走人...

經過左3個鐘後, 我變成左個菲律賓人,
而鬼仔就要攰到痴線咁再開多差唔多4個鐘車返Chicago,
返到去已10點幾啦!! ZZZzzz......

到Indianapolis去 -- 小孩子都要及時行樂

上個周未去左鬼仔家鄉 -- Indianapolis,
不過今次因為佢爸爸屋企仲裝修緊,
所以改左去佢爸爸女友o既appartment借宿,
個appartment好大好正ga, 個境仲好靚, 係對住一個小小的湖,
佢地成日問我, 呢d咁o既單位係香港要幾錢??
講真, 係香港真係可以賣到天價啊!!!

呢次去Indianapolis有咩做呢??
就係去參加鬼仔表哥o既house party,
成廿幾人, 仲有好多小朋友tim,
不過話題唔多o岩傾, 所以同其他人冇咩交流。

有一樣野都幾得意, 在埸有個小朋友 -- 約5-6歲大既小妹妹,
我一去到見到佢係紙到畫野,
望下畫咩啦, 原來係寫字, 仲要係寫中文(!!)
於是我忍唔住係後面廣東話讀出: 一, 二, 三, 四, 五, 六, 七, 八, 九, 十~~ (個十字佢寫左X)
佢爸爸即刻雙眼發光, 捉住我問我係咪識睇,
我話係呀, 再傾傾下.......
原來佢個囡囡學緊國語但淨係記得一至四點讀,
後面個d唔記得, 之但係佢兩公婆都唔識中文,
叫我提提佢個囡囡讀一次一至十(!!) 哈哈哈~~
我讀完之後佢個囡囡好怕羞咁望住我笑,
之後飛左去同佢d朋友仔玩lu~~
當然佢爸爸都係由得佢去玩啦!!
(俾著香港d父母, 好可能會逼個o靚妹背晒先可以玩;
真係ga, 我係"玩具扭計城"見過想買玩具咩? okay, 你識串"邊個邊個"字就買啦! <--俾我實唔"狠"串, 最多唔買, 吹咩??)

我望住佢地係草地又爬又跳又跑,
模完地下唔洗洗手就食野, or 跌左落地又執返擺落個口都冇人理。
(我諗起一個朋友話佢同事有次帶佢個"寶貝仔"上公司逗利是,
有人請個小朋友食全盒入面d糖, 個阿媽即喝住話: 唔好俾佢食呢d! 佢淨係可以我係日本訂返o黎o既野食ga咋!!
聽到之後真係眼到突埋, 我真係好想知佢大個左會點?? 會唔會因為篤魚蛋而食L死左??)

有d甚至玩玩下除晒d衫 (得返條片片) 跳入個吹氣水池,
個日有d凍, 10幾20度左右~~
我睇到之後真係替佢地高興!!
佢地d笑容真係好開心好天真!!! 特別可愛~~

有一個小妹妹(就係學緊中文o個個),
佢跑跑下take親跌左係到,
佢喊左幾聲, 佢媽咪只係扶起佢睇下有冇整親,
然後同佢講: Alright, Kate, it is okay. It is okay. Are you okay??
佢就點點頭唔喊, 又再去玩啦!!

仲有有個小朋友4歲左右, 玩到出晒汗覺得熱,
佢自己曉得除衫 (有扣鈕o既)。
嘩!!我即刻諗起以前有個舊同事佢講起自己個仔d趣事 (佢覺得趣咋, 我覺得好kai),
佢話個仔(好似6歲)有次熱到成身汗, 對住個外傭姐姐喊咁口講"好熱熱呀!!"
佢竟然係怪責個外傭唔醒目, 因為佢見個仔熱都唔識幫佢除衫。
我聽完真係O晒咀!!!
成六歲仔連衫都唔識著又唔識除, 由得佢熱Q死算啦~

再睇睇佢地玩o既遊戲,
沒有一個手上係拿住i-phone, i-pad 篤篤篤,
而係草地上有咩玩咩,
有豆袋玩豆袋, 一個拋一個搶,
一係就一齊疊疊疊。
又俾佢地諗到將爛左o既太陽傘個塊布一人拉住一邊,
再放個網球上去, 然後狂扭睇下個波幾時跌落個洞到, 真係創意無限呢!!!

見到呢班外國小朋友可以咁自由奔放,
我真係覺得呢家香港d小朋友好那可悲,
一係d父母捉佢地去學五國語言, 琴棋書畫,
一係就俾錢去學如何自理(??) 俾錢人教自己個仔女點揸筷子, 綁鞋帶 etc.
(我更聽過有小朋友要去上特首班, 學習如何做特首。 <-- 點解我地個特首唔去學埋一份o既??)
亦有聽過有小朋友對鋼琴老師呻"我好攰呀!"。
我寧願俾佢地自由自在, 開開心心咁去享受呢個童年啦!!!

我當然知道外國o既月光唔係特別圓啦,
外國當然都有怪獸家長,
(好似我依家住係鬼仔屋企附近有間salon係專俾小朋友做facial同massage ga(!!)
之但係, 我係香港見到o既怪獸家長就特別多啦!!

不過, 好可能係佢地眼中會覺得呢班o靚仔o靚妹已經輸晒係起跑線之上。

到Cincinnati 打Golf去~~

在Tennesse過了四天之後下午我們就開車到Cincinnati 去,
因為我們本來打想去鬼仔家鄉探他家人,
不過他爸爸家的dinning room 和廚房正在裝修,
而他的姐姐又因工作太忙未能回家,
是故我們改了在Cincinnati 見面。

因為他姐姐在Cincinnati 工作,
而他家到那裡只要4個小時,
我們由 Pigeon Forge 開車到Cincinnati只要4-5個小時(跟去他家差不多)。
他爸爸立即找了一間酒店,
我們可以在那裡渡周未呢!!

在路上吃了一個很hea的快餐~杯lemon tea超難飲...

雖然說4-5個小時車程算是很近,
但去到Cincinnati已經差不多5點了,
而且比起和暖的Pigeon Forge, 這裡算是很冷 (對我來說)。
check-in 之後有什麼好做呢???
就是等鬼仔的爸爸來到後一起打golf去,
其實我不會打golf,不過鬼仔跟他爸爸都愛打,
所以我就陪他們去最近的高爾夫球場玩玩。

這裡的馬路不時會殺出一兩隻鵝走過, 很搞笑,
還有就是酒店附近的草地很多地鼠, 好可愛呀!!
但我沒有影相, 因為在車內影不到, 也不想嚇倒牠們。

鬼仔爸爸的背影, 沒見兩年, 他曬得更黑了(!!) 跟鬼仔和他姐姐一點都不像~

鬼仔的球捧~

無無聊聊地看著他們不停發球,
因為時間已不早了, 所以他們只在發球的埸地玩玩,
當然我也有雞手鴨腳地試玩啦,
但我覺得一點都不好玩囉!! 哈哈~~
我完全不懂怎樣才打中那個球,
最重要是, 打中了之後又不知它飛到哪裡去(!!)
究竟有沒有人可以告訴我,
用一枝好長好長的棍將個好細好細的波打入一個合好細好細的洞, 有什麼好玩呢??

晚上, 到了一間愛爾蘭餐聽吃飯,
味道很不錯, 也可能因為我已餓了很久。

回到酒店, 明明剛才我們才喝了不少啤酒,
但鬼仔父子又發神經地說要喝威士忌(!) 還抽起了從Pigeon Forge帶來的雪茄(!!)
救命, 我覺得好臭~~
所以就躲入了房中睡覺去。

早抖!!

聽雨

少年聽雨歌樓上， 紅燭昏羅帳。
壯年聽雨客舟中， 江闊雲低斷雁叫西風。
而今聽雨僧廬下， 鬢已星星也。
悲歡離合總無情， 一任階前點滴到天明。

哈~寫完頭先篇blog, 講起落雨,
我次次去旅行都會遇上天氣不佳o既du野。

噢, 對唔住, 我係香港已係咁du,
次次睇天氣報告話落雨, 心諗帶定遮冇死啦, 佢又唔落,
帶左一, 兩日都唔落條氣一唔順, 唔帶,
佢又落狗屎咁!!!
真係黑到冇朋友~~
就連我每次睇波捧邊隊都輸,
所以我d朋友都會叫我做"明燈",
做我對家就掂ga啦!!!!

回歸正題,
我o黎左美國玩之後, 芝加哥天氣都好差,
不時都會落雨,
而唔知幾時起, 每次落雨我都會諗起蔣捷o既虞美人,
呢首係繼蝶戀花之後我都好鐘意o既一首詞。
因為我覺得可以寥寥數十字,
將由少年到老年嘅心境變化講起,
簡直妙到癲。

但暫時有一樣野感到好無奈o既係,
當我諗起呢首詞時想同人分享下,
可惜, 同鬼仔講都冇用,
我又唔知點翻譯成英文(!!)

唯有係到分享下啦, 哈哈哈!!

天有不測之風雲

自從o黎左美國之後,
成日都見到下下成二, 三百磅o既人,
出親街食野d野食又鬼咁大份,
搞到我好驚長此下去會變成肥妹返香港,
甚至連門口都出唔到。

除左係屋企做埋d小運動之外,
我決定出去散下步啦!
上星期我又唔係芝加哥,
返到o黎之後幾日都唔係咁好天,
落左幾日雨, 仲好凍 (對我o黎講, 因為我係亞熱帶生物o黎o既)。
琴日下晝終於俾我等到好天啦,
天氣曖返好多, 有廿幾度, 於是去左附近散步,
唔覺唔覺都行左半個鐘,
竟然仲行到出晒汗, 要衝入圖書館避暑。

點知到左夜晚, 冇啦啦又落起雨,
仲好Q大聲喎, 後來又聽到d窗都啪啪啪啪,
於是鬼仔行去窗口望下 (佢驚死架寶貝車有事),
又急急腳走出來話: Baby, it is hailing!!
嘩~~~ 講真, 我咁大個女未見過落雹ga。
我知道香港都會有, 但次次都係返到屋企睇新聞講先知某d地區落左(!)
佢仲冒住中頭獎o既危險執左一粒冰雹俾我, 佢話今次好細粒咋喎, 平時仲大d都有。

明明下晝個時仲好好天,
夜晚又落雹, 真係天有不測之風雲。
我要趁呢兩日下晝咁好天去多次散步。

去旅行必做o既事??

自從來了美國被軟禁 (講笑, 我可以出街o既) 之後,
每天早上聽某電台的晚間清談節目 (香港時間晚上 10點至1點) 就成為我早晨的精神食糧,
雖然起初時一早流流尼著晚間節目感覺好詭異,
前幾天節目內說起去旅行必做的事。
哈!! 我立即想想自己去旅行必做的事........

登登登登登!!!

其實沒啥特別, 就是寄postcard (!!)
不止要寄給朋友,
還一定要寄給自己呢 (好白痴, 我知道!)。

上星期去了Smoky Mountains National Park之後,
我都立即買了postcard喔,
雖然沒有看到黑熊但這裡的postcard選擇不多,
差不多每張都是黑熊(!!)
唯有照買吧!!!

除了自己, 還寄了給幾位朋友呢, 希望跟他們分享路途上的點滴吧!!

Moonshine -- Tennesse's white whiskey

參觀完地洞之後又開車到鎮上,
這裡遊客很多, 比較busy,
我們去了Ole Smoky Tennessee Moonshine Distillery參觀。

究竟什麼是Moonshine呢??
就跟我此blog的topic一樣,
就是威士忌酒啦!!!

為什麼叫Moonshine呢???
話說在經歷了經濟大蕭條後,
美國政府怕大家再喝得太多酒就會製造更多社會問題,
於是頒布了 -- Prohibition (禁酒令 -- 1913-1933)。
公家沒有酒賣, 人民為了喝酒就唯有非法私下釀酒囉 (泛指威士忌)。
由於私下釀酒是非法的, 不能在光天化日下進下,
要於夜裡製作及運送, 是故稱為"Moonshine"啦,
大家仍然可以偷偷地在Speakeasy的地下酒吧買到酒。

如今Moonshine已經不再是非法,
可以光明正大地飲啦!!!
這個Ole Smoky Tennessee Moonshine Distillery地方不算很大,
但可以免費參觀, 了解一下有關moonshine的歷史,以及Ole moonshine,
看看釀酒的過程。

最最最令鬼仔開心的是 -- 這裡還可以免費試飲Moonshine喔!!
要21歲以上才可以喝呢, 所有人都要出示證件,
因為我後面那個白頭老伯很搞笑地說: It makes me so happy.
現今的Moonshine呢已經發展到很多口味了喔~
我都試了幾款, 最喜歡是 -- Cherries及 Apple pie味,
鬼仔則喜歡原味。

品完酒, 更可以買酒及有關的產品,
酒呢, 我沒有買啊, 我最後只買了兩瓶jam,
因為我不知道怎樣帶回香港,
而且我媽咪都喜果醬。

真係唔講笑, 黑熊係呢到o既代表呀, 四圍都見到ga

Tennessee's Forbidden Caverns

在Tennessee渡假第二晚下起了暴雨和狂風雷暴來,
在香港時打風我都未驚過,
之但係呢間小小的木屋時,
你係可以feel到成屋震晒, OMG!! 真係有d淆。
由4點到7點每個鐘都醒一兩次,
睡眠不夠, 加上天雨路滑所以今天還是不要作戶外活動啦!!

去吃午餐和買明信片時在店內看看宣傳單,
看看這裡有什麼好玩的。

我們的午餐, 呢到好多d BBQ餐廳, 鬼仔話當地好有名ga wor! oh no!! 唔怪得呢到咁多肥人, 後生到老o既都個個二三百磅咁款。

呢到有好多宣傳單俾遊客參觀, 鬼仔本來想玩獨木舟同急流, 但天氣唔好, 我地選擇左 -- Forbidden Caverns 同埋 Ole Smoky Tennessee Moonshine Distillery

首先去左Sevierville的Forbidden Caverns,
剛好下一個tour差唔多就開始 (要錢ga, 唔記得幾銀)。
**注意: 十二月, 一月, 二月及三月休館。

呢個就係tour o既地圖

有一個導遊帶領我地由館內o既通道走入去地洞,
可以見到鐘乳石, 地下湖, 不少奇形怪石,
導遊仲會逐講解, 又會停下停俾大家影相,
我地個一團約有10個人,
一齊擠係又黑又濕o既地洞好親密。
** 請無視我爛到爆o既拍攝技巧, 我係累暗之中影親都係咁=___=**

你地覺得呢個一柱擎天似乜???

呢d都係鐘乳石o黎ga.

係咪好窄呢??? 有兩公婆都好大份, 可能有300lbs, 但佢地都行到過去~勁!!!

不過呢個山洞唔行得耐,
約係到玩左一個鐘就走人, 去下一站啦!!

捉蟲入屎忽

話說上一個星期我感到自己o黎左美國後有點掛住廣東話粗口(!!)
百無聊懶在家中, 於是問鬼仔: 你想學廣東話粗口嗎??

起初我諗住鬼仔之前學左成個星期都唔記得"早晨"同"早抖",
所以我就算教識左佢粗口都唔會記得ga啦, 唔算教壞佢啦。

問候人地阿媽同性器官個d我都唔會講,
於是我教左佢一句, 只有兩個字o既粗口, 係我同朋友比較會講o既,
係我地一致認為最百搭o既粗口, 因為可以當名詞, 動詞, 形容詞等使用。

點知!!!!!!!
鬼仔今次用左一晚就記住左,
仲成日講(!!)
特別係開車遇到衰司機時係到講!!!!!
但佢次次都係用"XX啦你"或"你XX啦!"(!!) 
好似對住我講咁, =___=
因為佢淨係學識"你"字, "佢"字對鬼仔o黎講太難,佢未學識。

教識佢一句粗口就成日話我......... 下次都係唔好再搵自己笨啦。

咁食法點會健康???

早排睇新聞話紐西蘭有個30歲就生左8件o既女人,
懷疑因為飲得太多可樂而係屋企心臟病發瓜左。
唔係我黑心/冷血, 我睇完之後真係覺得佢都幾抵死,
係人都知道飲得多汽水唔好ga啦, 仲一日飲成10公升 (即30罐)!!!
(但死者家屬話可樂生產商要負責任喎, 吹漲!!)

你話係咪痴線呀??
而且, 就算你幾鐘意食/飲一樣野, 但都唔可以日日在食掛???但, 原來我錯左!!
真係有呢d人。
話說上星期我同鬼仔仲有佢屋企人去左Cincinnati,
佢地就講起鬼仔daddy女朋友o既3個女 (3個都係經典, 遲d再講),

最細o個個女, 今年都21歲啦!!
佢地話自佢懂性以來, 佢淨係會食一個tone的食物 -- 米黃色,
所以佢由細到大食來食去都係apple and cheese pie 仲有 macaroni and cheese等等,
我聽完即刻諗起o個個紐西蘭女人。
佢咁食法真係好唔健康囉...... 就算唔死住, 第日一定都會有好多病呀!
鬼仔仲話我知, 佢以前讀書有個同校同學都因為長期只係食 - chicken nuggets 而搞到身體有事瓜左!!

我聽到之後真係覺得好得人驚呀,
我想像唔到如果我每日都只係可以食青咖哩羊o既話會變成點??
我諗一星期唔夠我已經會由愛變成憎啦!! 仲可能冇得大便tim喎。

所以為左自己身體著想,
真係要食得健康d,
唔係咩冇益野零食都唔食,
而係唔好食咁多, 間唔中先食下,飲食真係要健康同均衡先得呀,
唔係第日搞到有病真係喊都無謂。

Smoky Mountains National Park 行山去

Tennessee 有個國家公園叫 Smoky Mountains National Park,
我們下榻的渡假屋跟這裡很近, 約20-30分鐘車程。
先去了這個公園的看有關歷史及園內動植物的介紹,
更有電影短片介紹。
可以選擇join tour, 亦可以自己開車去四處走走...

參加tour的人喔~

有不少人會釣魚去, 也有不少人走山路行山去;
我倆泊好了車之後都行山去。

行山的小徑

經過的河流~~其實還有瀑布呢, 但之後的路太多泥濘, 很難走, 所以沒看到.

這裡景色很不錯, 但我只看到小動物,
如地鼠, 獺, 松鼠等等...... 當然還有昆虫, 更看到一堆蛇(!!)
但沒有看到這裡著名的黑熊 (看到之後可能無命吧??)。

不得不提, Smoky Mountains 真的很煙霧迷漫, 可能這天剛下完雨吧??

小小蝸牛~~

蜈蚣~~

不知名花卉~~

一堆蛇~不知道纏在一起幹什麼。