小學雞童年回憶 -- 可樂雞翼

記得細個媽咪都煮過下可樂雞翼,
但之後已經好多年冇食過,
因為雞翼多激素, 可樂又冇益。
之前整完醉雞後就諗起不如整下可樂雞啦,
反正之前飲淨兩罐可樂, 鬼仔又極少飲,
(正因如此我地6罐都飲左成個月未飲晒)
趁回港前用埋佢啦!

於是又上網搵左幾個食譜,
最後做D唔做D咁又搞左個比較容易o既出o黎,
咁難得, 我緊係要記底佢, 日後睇返啦!!

材料:
- 雞翼 <-- 很廢
- 紅蘿蔔（切段）x 1條 <-- 可以唔加, 但我覺得有D蔬菜又好似健康少少
- 薑 x 2片
- 蒜頭 x 3粒
- 可樂 x 2 罐 (其實一罐就得但我個d係細罐裝)

汁:
- 鼓油 x 2湯匙
- 酒 x 2湯匙
- 麻油 x 1 湯匙
- 糖少許

步驟:
1) 把雞翼洗凈, 用滾水煮約 2分鐘後撈起瀝乾。
2) 又用滾水煮一煮蘿蔔同瀝乾啦! <-- 其實可以唔洗, 但我鐘意佢林林地~~
3) 燒熱油鑊, 爆香薑片同蒜頭。
4) 再落雞翼。煎香翼加蘿蔔略炒, 再倒入調味料同可樂。用中火煮滾, 再以細火繼續煮約 20分鐘。要不時攪勻, 等雞翼平均顏色及熟透。食得!!

好開心, 有咩簡單過4個步驟我就食得丫, 嘩哈哈哈哈~~

一邊o也煮雞翼飲啤酒睇運動, 你都咪話唔爽 (當然下晝又要做運動減肥啦)。

其實由細到大我都係運動盲,
但係每次一到左四年一度o既奧運我都係咁狂熱,
日以繼夜, 夜以繼日地痴住電視睇比賽。

係美國睇奧運有好多條Channel都日播夜播,
唯一有少少唔滿意係D熱門項目, 亦係我最愛睇個D,
要等到夜晚先有重播, 朝早冇直播,
鬼仔話係因為呢個時間D人收左工多人睇喎。

有樣野好開心的係終於唔洗好似係香港時日夜狂講中國奪左幾多金,
我都明白當然每個國家會支持返自己國家o既運動員啦,
就好似美國都成日在播佢地比較有機會得獎o既項目,
而且都會著重訪問講返佢地自己友咁。

老老實實, 我都會支持返香港隊,
就好似一有單車同羽毛球等我都必睇,
前日有個體操動作以我地香港運動員命名我都好開心ga!!
我雖然咁唔鐘意大陸, 但作為一個港人,
唔多唔少心態上都會關心中國運動員表現,
特別係跳水, 射擊, 體操等等~~琴日見到體操男團同跳水, 我都睇得好緊張。

但我最唔鐘意係只係成日講中國隊乜乜乜, 中國隊物物物,
好似睇緊國內排名咁, 好煩。
最討厭o既係佢地只會關心係金牌方面,
銀牌同銅牌都好少提, 好似得唔到金牌個d唔係運動員咁!!
我覺得呢種行為好乞人憎, 人地台上一秒, 台下十年,
佢地就以一個金牌去衡量。
又好多時佢地得獎後o既言論都會令我好反感,
D民眾又係巴巴閉閉咁。
先唔講劉姓個件 (佢都未有份落埸),
但前兩日游水孫姓個位人兄,
佢訪問時竟然話: 「擊敗所有韓國人」(!!!)
大佬, 游下水啫, 洗唔洗國仇家恨咁款呀???
完全係顛覆奧運o既全球一心+體育精神,
又一強國“謙遜”特色。
我反而覺得外國o既運動員好得體,
通常講下得獎感受之外, 仲會話"It was fun"/ "We had a lot of fun"等~~
好明顯人地係當呢埸比賽真係Game。

最後, 我想話, 點解中國隊o既番茄炒蛋制服可以咁樣衰&娘??
李寧牌被人笑左十幾廿年都唔改, 真有性格。

參觀啤酒廠, 飲勝!

上星期六沒有留在家中看奧運,
一早鬼仔就車到Milwaukee去,
Milwaukee位於芝加哥的北面,
車程約個半至兩小時。

吃完午餐後已經一點半,
我們到了Lakefront Brewery,
剛好錯過了啤酒廠的導賞團時間,
要等下一埸。

(啤酒廠不算很大, 而且門口企左三隻醜野)

先說明一下入埸人士必須要件滿21歲,

導賞團費用是每人USD 7.00,
還可以這木幣換啤酒 -- 一共4杯,
邊等邊喝, 不夠再以現金形式再買;
另外, 還可以去買紀念品。

其實Milwaukee不只這一間啤酒廠,
不過這一間似乎較有名, 所以就去嚕~~
這間啤酒廠於1987年成立,
他們的啤酒及導賞團都屢獲殊榮。 <--好娘o既形容
其中以New Grist啤酒最為有名,
此酒是以不含麵筋成份釀製而成的,
要知道現在愈來愈多人都有對麵筋食品有敏感丫。

導賞團一開始那個邊飲啤酒邊說笑的大肥佬逐一問起大家來自那裡,
嘩~~不少人都是穿州過省來遊玩的呢,
最遠的不是德州或加州, 而是我, 哈哈!!
因為只有我一個亞洲人面孔, 而且還是來自香港,
那個tour guide 說他因而感到高興,
還問我明不明白他說什麼(!)
最後更一直以Hong Kong來稱呼我。

**Oh man~~~ 基本上我來了美國後已被問過好幾次,
如鬼仔的婆婆, 還有上次去Tennessee玩時的一個導賞團領隊;
很多外國人都不知道香港究竟在哪,
最常搞亂的是不少人以為香港是在日本(!!)
故以為我們跟日本人一樣不太會英語。**

Okay, 有點離題了,
說回那個導賞團呢,
其實很短, 他大概地說說啤酒廠的歷史,
以及於每部正在釀製啤酒的機器前講解一下如何釀製啤酒等等;
不過他的解說是超級有趣的, 很會說笑,
還不時整蠱一位快於九月結婚的男士,
及喜歡大家一起跟他唱歌!!

一邊行大家是可以喝酒的,
但他提醒大家千萬不要觸摸現場的機械,
以免形影啤酒的味道或受污染。
參觀完了之後大家仍可購買啤酒及熱狗,
最後更可以用完的膠杯換取此啤酒廠的啤酒杯呢~~
我們一共有兩隻, 但放了在車上, 所以未有相upload。

啤酒廠就於河邊,
可以買啤酒住下來邊喝邊欣賞,
也有不少人在划艇和踏單車。

唉~~本來想去這裡的Art museum看一個名為"Poster of Paris"的展覽,
但參觀完啤酒廠已快四點了,
開車到了博物館已四點多,
而關門時間是五點, 所以就沒有去了~~

這個湖是跟芝加哥那一個同一個來的~

回家前去了吃意大利菜, 好味道!!

充滿驚喜的奧運開幕

星期五鬼仔又係屋企返工,
可以一齊睇奧運開幕。

幾個鐘流流長緊係要搵D野咬下啦,
但冇咩材料, 又要自己整。

好彩, 醒起睇完Blog友o既Custard post,
我冇雲呢拿油呀, 冇得整住,
但見佢提到燉蛋;
諗諗下, 又夠快又夠簡單,
仲等鬼仔可以食多樣中式甜品, 一於整佢。

成世女只係中學時整過一次咁大把咋,
鬼叫平時咩係屋企咩都有媽咪煮咩~~
仲要係中一時第一堂家政堂整過o者, 都唔多記得點整。
好彩最後都俾我搞掂左, Yeah!!!

想凍食但由於時間關係,
冇時間等佢係雪櫝等佢凍,
唯有搵冰水坐凍佢啦, 哈哈!!
由於我用左佢d whiskey 杯,
等食時仲將一粒士多啤梨放上面整色整水,
鬼仔話呢個唔似中式野, 似chinese pudding喎。

真係捉蟲, 坐凍佢時又要邊抺走d倒汗水~~

(圖片來源 -- BBC NEWS http://www.bbc.co.uk/news/in-pictures-19020830)

講返個開幕禮,
嘩嘩嘩嘩~~以有限資金來搞真係搞得有聲有色,
而且好有故事性又有歷史意思, 仲充滿著英倫色彩呢~~
一開波以莎翁故事作背景, 再講起工業發展,
James Bond + Queen o既出埸真係有驚喜,
之後仲有JK Rowling, 又有Mr. Bean,
仲有家傳戶曉o既故事大壞蛋代表戰爭, 黑暗時期,
英國文學真係基根夠厚喔!!

再來一班青年人載歌載舞,
好似開party咁, 既有英倫電影發展,
有punk又有rock,
更有英倫搖滾代表人物 -- Paul McCartney~~正!!
呢d咪就係英倫文藝囉,
光是銀彈做唔到ga。

最開心係更有我超愛o既Arctic Monkeys演出呀!!!!
點可以唔俾一百分呢???
(有埋MUSE我俾200分, 哈哈~真大貪)

而鬼仔就話最鐘意係點聖火一part,
我都覺, 唔只因為有Beckham份,
佢地的出埸同交接真係好正,
個200幾枝好似花o既火炬逐漸點著再慢慢好升起,
更係好有創意同好靚丫,
仲有最尾個煙花都安排得好正, 目不暇給!!!

真係要佩服Danny Boyle, 以有限製造無限~
創意+幽默+經典一樣係咁有震撼感,
我好鐘意呢個開幕禮!!

好啦, 呢個周未去Milwaukee玩,
祝大家周未愉快!

參觀Chateau Ramezay Museum

唉...唔知做咩呢排有d相uploaded之後又見唔到,
有個圓圈轉轉轉......搞到個hea遊Canada trip拖完又拖......

又行返去Old Montreal,
去左呢個Chateau Ramezay - Historic Site and Museum of Montreal~~

呢個博物館原本係Claude de Ramezay 的官邸, 建於1705年,
亦係全省最古老o既私人歷史博物館,
於1949年為列為加拿大國家歷史遺址,
係魁北克第一座被列為歷史遺跡的建築。
呢個城堡展現左500多年来加拿大, 魁北克以及Montreal歷史演變同發展等等~~

每年十月中至五月三十一日就於星期二至星期日開放 (10am - 4:30pm),
而六月一至十月中就每日都開放 (10am - 6pm)。
*** 要科水ga -- CAD 10.00。

就咁睇好似平平無奇 (因為我好叻女地唔記得係前門影, 死左去後門囉!)

咁大塊招牌, 好易搵...係正Montreal City Hall對面~ 咪以為人地呢張相玩下野咋喎, 佢地d工作人員大熱天時都要著咁o既古裝ga!!

入到去, 每個廳都有部咁o既野 (有d幾部), 6種語言俾你揀, 你就拎住個耳機聽...仲有片睇ga~
都係講解一下呢到o既歷史背景咁... (呢隻白色野佢話自己係鬼魂, 驚未??)

入到去呢一層都係睇下d相片同畫咁...

行到另一邊就多D野睇啦, 有主人/當時D人用過的東東~~
我幾鐘意睇呢D舊野~~雖然我鐘意新科技o既方便同快捷;
但係我又好鐘意d古舊野的設計同想像一下以前的人用時係點咁...

因為呢到不時會有展覽,
行到另一層, 就介紹左好多當時流行的疾病同醫學物品...
入到去有一部機叫你抽個number, 就自己係個板對返你個number配邊一個角色咁,
一邊行一邊睇下當時點醫同當時的醫學科技等......
最後一間房又會有個板講返每個角色o既結局咁,
而我個角色, 細個得到類似敗血病o既 (睬~~~) 最後仲十幾歲瓜埋, 魂歸天國 (!!) 阿門!

簡介當時的疾病~~有個超恐怖, 唔記得咩病, d人會捉你去放血醫你(!!) 真係唔死都一身散......

以前醫生用的東東...

仲有當時牙醫用o既工具, 而佢隔離有圖畫描繪當時d人睇牙時候的情況:
有一幅: 個病人係要人捉實佢係椅上被剥牙!
另一幅: 係個病人已痛到暈左........=___=

呢D又係介紹係當時的醫具..... 包括老蓮咁大把手術刀/ 針筒等等...
我諗......如果以我呢d咁廢o既人, 生活於當時肯定命都唔長呀....
咁大把野拎出o黎, 我真係命都俾埋佢。

個museum都唔係好大, 個幾鐘已行完晒~~仲係入面呆多陣等雨停先走~~



呢座咁大咁宏偉o既就係Montreal City Hall啦~~

準備睇奧運 + 笑話一則

唔經唔覺, 聽日就倫敦奧運開幕啦,
好似不久前先開始百日倒數,
估唔到咁快就已經到, 時間過得真快,
我都好快要回港了。(哈! 衰野就唔講住。)
仲有最開心係奧運主題曲Survival由我最愛o既MUSE唱!!
講返奧運, 最近因為奧運都多左好多有關o既產品,
提醒緊你奧運就到啦!
例如今日散完步, 入左Store買返我食開o既Cereal,
一拎上手, 背面 -- 變成咁,

唔...... 老老實實, 美國隊o既運動員淨係識Michael Phelps (!)
呢一版野我都冇個識。

另外, 行到可樂系列,

嘩~~又係一大堆奧運Version o既野。

英國已經舉辦過唔止一次, 所以好多野都會係翻新,
聽聞話唔會因而花費大筆巨額同搞無謂基建。
我一直最欣賞外國係活化, 善用同創意方面,
而唔係好似某"發展中國家"咁, 咩都要面, 咩都爭住認第一。
雖然好多人話北京個次開幕禮最好睇同最震撼,
但我都仲係對呢次開幕禮有d期待,
因為我覺得唔係樣樣野都要用金錢堆砌出o黎。
嘩, 大佬! 有錢到射咁多枝野上天等佢唔好落雨喎,
直頭係少林武功加唱歌跳舞啦, 咁都俾佢諗到。
其實我對北京奧運開幕冇咩好感,
可能當初期望個張導演玩色彩等等,
點知! 佢玩多人 (人喎, 中國大把啦)!! 吹漲~~
而且成個開幕仲燒錢到不得了, 更加唔鐘意。
(係我錯, 基本上自從《十面埋伏》後, 我唔應該再對張藝謀有咩期望;
聽聞佢最近又燒左一千八百萬人仔為高鐵拍左一部五分鐘的宣傳片)
基於對上一屆奧運我剛入了舊公司,
當時跟左一個痴筋上司,
搞到晚晚要被逼陪佢OT到十一, 二點,
有次仲要我星期六都返去做埋D kai野,
(依家諗起都仲心酸)
差唔多成個奧運都冇睇過直播賽事,
就連開幕都係睇重播。<-- 可能就係因為咁, 人人都講左內容係乜, 就冇左驚喜

今次終於可以睇直播, 而且d時間都還算okay丫,
唔洗捱眼訓, 所以好興奮ga!

鬼仔知道我唔鐘意中國大陸,
因為佢地派咁多人去參賽, 嬴左金牌就巴巴閉閉咁,
又由細到大都非人訓練, 練到人傷晒, 輸左就提都唔提,
佢地好興輸打嬴要, 我就好唔認同啦!
於是, 佢問我會唔會支持美國隊喎,
嘻嘻! 我實話會啦。
反正奧運我冇話特別鐘意邊個國家/ 邊個運動員 (有都退左役了)。
講左咁耐, 大家又鐘意睇d咩奧運賽事呢??
我鐘意個d都好熱門ga,
- 競技體操 (最鐘意俄羅斯, 通常靚到公仔咁)
- 跳水
- 游水
- 乒乓波
- 女排 (男排咪搞, 個個力的表現)
- 短跑 + 跳遠
- 射擊
- 羽毛球
其實仲有好多都會睇, 但最主要就睇呢幾樣,
反而冇左足球喎, 哈哈, 因為少左好多巨星丫嘛, 世界盃好睇d。
*********************************************************************************
仲有一單白痴野講講,
話說友人的公司之前有好多人離職,
所以就收到好多goodbye e-mail出o黎,
有d仲懶到會copy一樣o既內容tim。
收得多, 而且又唔多識o既同事, 通常都唔會細睇ga啦,
點知友人一係唔睇, 一睇就笑爆咀。
有日佢收到一封, 香港同事o既,
劈頭第一句: "It seems to be just yesterday that I crossed HK's border for the first time"
大佬, 你copy唔係問題, 但問題係你是香港同事呀!
條友真唔消化下就send出街啦。

真係面就人地俾, 架就自己拎黎丟。

丫!! 咪住~~可能佢家住深圳, 每日都過關返o黎香港上班掛.......

散步行到一身汗, 返到屋企又補充返消耗左o既脂肪.....哈哈!

我最鐘意薄荷味~~

好啦, 準備去食飯~~